ليس فى حاسة سليمة الأحد الثالث من بؤونه

بأسم الاب الابن والروح القدس الاله الواحد امين.. فلتحل علينا نعمته ورحمته وبركته الآن وكل اوان والى دهر الدهور كلها امين ..تقرأ علينا الكنيسه احبائي في هذا الصباح المبارك فصل من بشاره معلمنا متى، معجزه عملها ربنا يسوع المسيح حينئذ احضر اليه مجنون اعمى اخرس، مجنون اعمى اخرس عايزك تتخيل معي شكل رجل مجنون واعمى واخرس... شكله فظيع شكله صعب مش بس مجنون اعمى اخرس وبس ...لا وعمال يصرخ وعمال يتمرمغ في الارض.. والتلاميذ بيحاولوا فيه ومش نافع ،لان حالته كانت صعبه جدا، جاء ربنا يسوع المسيح وطبعا هو الطبيب الشافي لانفسنا واجسدنا وارواحنا ،المجنون الاعمى الاخرس.. دة احبائي...تشبيه بسيط جدا للخطيه. شكل شنيع .الشخص احبائي المستعبد للخطيه تلاقيه غير متزن تلاقيه ما بيشوفش ما بيسمعش ما بيميز..فقض صفه مهمه جدا اللي هى اتزان عقله ..رجاحت فكره.. تقديره للامور.. كل ده بيتدمر.. ايه اللي بيدمر الحاجات دي كلها ...الخطيه عشان كذا خذ بالك الراجل المجنون المجنون الاعمى الاخرس ده ..قال لك مش مجنون اعمى اخرس بس. لا ...ده بسبب ان عليه روح شرير. عليه روح شرير جعلته انه يكون في الشكل الشنيع ده دي اثر

الخطيه في حياتنا احبائي...تشوهنا ..صوره ربنا التي فينا تتلوث مجنون اعمى اخرس ...وخذ بالك تملي الاخرس يبقى اطرش ولا يتكلم ولا يسمع ولا يشوف ولا يفكر.. دي الخطيه.. احبائي الخطيه خاطئه جدا طرحت كثيرين جرحى وكل قتلاها اقوياء ...عشان نركز.. ناخذ الثلاث كلمات دول مجنون واعمى واخرس ..
اولا مجنون، القديس انطونيوس كان بيقول لهم كده اجمل تعريف وادق تعريف للجنون هو الخطيه... الخاطى والمجنون ..لية
اصل ده عباره عن اختلال عقل.. الانسان الذي يفعل الخطيه بياذي جسده ويبيع ابديته. يغضب الله مصدر الاحسان في حياتنا كله نهينه.. ونصمم ونكرر.. قال لك هو ده الجنون اللي يبيع الغالي بالرخيص احبائي ده مجنون... انت جايب لابنك مثلا سلسله ذهب وجاء لك ثاني يوم من غير السلسله، قلت له فين يا حبيبي السلسله.. قال لك اصل كان صاحبي معه ساندويتش قال لى اديني السلسله اديك الساندوتش ..فانا بصراحه اعطيته السلسله واخذت الساندوتش.. تقول له لا ازاي فين السلسله وفين السندويش ؟! قالت لي يا بابا السندويش كان حلو...طعمة جميل...تقولة اوعى..ده

بكذا وده بكذا.. تقعد تشرح لة... ويجيء ثاني يوم تلاقيه برضه واحد اعطالة قلم قصاد مثلا الساعه بتاعته ...اصل كان القلم حلو ..كل يوم يجي لك كده ...صدقني هو ده اللي بنعمله بالضبط كل مره بنكسر فيها وصيه بنبيع الغالي بالرخيص... كل مره بنبص وراءنا كل مره بنبص للارض ما بنبصش للسماء.. كل مره بنحاول نأمن النهارده ..ومانأمنش الابديه...دة عبارة عن عقل غير سليم.. اذا كان واحد عمال يفكر ازاي يأمن دلوقتي وهو مش بيفكر ازاي يأمن الابديه...دة يبقى انسان مش بيفكر صح ..فاكرين عيسو لما دخل على ابونا يعقوب ..كان بيأكل اكله. عدس احمر... كانت راحتها حلوه وكانت سخنه..قال له اعطيني أأكل من هذا الاحمر قال له ايه.. استغل الموقف يعقوب.. كان مكار شويه يعقوب بس ربنا خلصهم منه برضه ..قال له اعطيني أأكل من هذا الاحمر..قال لة ..بيع لى باكوريتك...قالة قوي قوي بكل سرور ..وآية اللى خلاه يقول له بيع لى باكوريتك ؟! قال له ايه ها انا ماضي الى موت بلا باكورية بلا بتاع. .. هات يا عم نأكل ده ايه ده... الخطيئه جنون احبائي.. خلينا دلوقتي يا عم اديني دلوقتي عمر وخلاص ..اعيش النهارده.. فين الأبديه ...فين الفضيله ..فين البر ..فين ارضاء الله.. عشان كذا

اختلال العقل والانسان الذي يبيع الغالي بالرخيص ده الجنون.. الانسان الذي لا يفكر ان يعيش لهدف ابدى وعايش لكل اهدافه اهداف وقتيه.. ده انسان بتاع دلوقتي.. عايز يلعب دلوقتي وبس.. كم مره انت ابنك عاوز يلعب دلوقتي وانت باصص لقدام ونفسك إبنك يبقى حاجه كبيره... يا ابني شوف مصلحتك يا ابني ذاكر يا ابني اعمل انت باصص لقدام.. والواد باصص لدلوقتي... وبس ..احنا ياما نعمل كده ..عاوزين نأكل ونشرب ونهيص ونقضي يومنا وخلاص.. فين الابديه فين المستقبل عاوزين ايه في الاخر.. صعب جدا احبائي انساني يكون عايش من غير هدف.. صعب قوي الانسان يكون عايش مش عارف هو عاوز ايه!!. تصور.. ممكن تسأل نفسك انا عايش لية تلاقي نفسك مش عارف ..انا عاوز اعمل ايه في خلال 2010 مش مهم 2010 زي 2009 دي 2006 ايام بتعدى وخلاص ...اقولك لا....انت لازم تكون عارف انت عاوز ايه.. واحد من الفلاسفه يقول لك لا تحزن الا لم تحقق هدفك..لكن احزن ان كنت بلا هدف.. لا تحزن لو حطيت هدف معين وما وصلتلهوش.. لكن احزن اذا كنت بلا هدف.. لازم اكون عارف انا عاوز ايه ..عشان كده احبائي الخطيه جنون عدم اتزان عدم تقييم عدم تفكير..بيع الغالي

بالرخيص.. ما يقيمش تبص تلاقي كده الواحد ممكن يشوف واحد مجنون تضحك عليه ..تقول بص بيعمل ايه ويعمل ايه ..صدقني احنا كثير قوي بنبقى عاملين زي المجانين دول بنبقى عاملين زي المجانين لاننا مش عارفين احنا بنعمل كده ليه ..او عاوزين ايه ..عشان كده اقدر اقول لك الانسان العاقل يبني بيته على الصخر.. الانسان العاقل يحسب الامور كويس ويقيم الامور كويس ويفكر كويس. ويكون مقدر للمسؤوليه ومقدر للأمور ..تقول لي بس كل الناس يا ابونا يعني عايشه يومها وخلاص يعني كل الناس مجانين؟! اقول لك معلمنا بولس الرسول قال لك كده شوفوا انتم لازم تبقوا زي عقلين يعني ..ولو كنت انا مجنون يا ريت كلكم تبقوا مجانين زيى..فقال لهم كده ان كُنا مختلين فلللة وان كُنا عقلاء فلكم ..لو شايفني ان انا مجنون اه يا سيدي مجنونه عشان خاطر ربنا.. بتسامح لية..دة انت مجنون.. لا انا مسامح عشان ربنا..بتعطية لية؟! ما بتخليش معك زياده ليه.. عشان خاطر ربنا ..يا عم خلي معك زياده.. ان كان لنا قوت وكسوة فلنكتفى بهم...... انا كده مجنون ؟! اه انت كده مجنون.. طب اذا كنت مجنون انا مجنون عشان ربنا.. واذا كان التصرف بتاعي ده عاجبك اذا كنت عاقل.. فلكم ..قلدني.. أن كُنا

مختلين فللله وان كنا عقلاء فلكم.. اول حاجه أحبائي .. الخطيه جنون تفقد الإنسان تفكيره الصحيح.. تفقد صوابه تفقده تقيمة للامور ..
ثانيا....مجنون اعمى...
الخطيئه عمى ايوه عمى ..يبقى ربنا قدامه واعماله قدامك ومش شايفها ..الشمس بتطلع والبحر بيقف عند حد.. والارض ثابته ..والاشجار والبحار والانهار والمحيطات والينابيع والحيوانات.. وربنا عمال يقول لك شُفني انا اهو واضح.. والانسان ما يشوفش ربنا.. ده ايه ده.؟! ده اعمى.. عشان كده يقول لك لهم اعين ولا يبصرون في ناس بتبصر اللي عندها عين بس مش بتبصر.. ايه اللي يخلي الإنسان ما يبصرش؟! الخطيئه ..الخطيه تخلي الانسان يفقد التمييز .تعمي العين تجعل الانسان في حاجز رهيب بينه وبين الله ولو ربنا كلمه ولح عليه يهرب منه.. لو ربنا عاوز يعلن له ذاته يبقى عاوز يهرب من ربنا بأي طريقه ..أعمى..لا يرى الملكوت ولا يرى القديسين..ولا الفضيله ولا يرى الابرار، تقول له أنظر الى فلان يكون راجل قدوه جميل يقول لك يا عم.. تبصت تلاقيه مش مبسوط بهذه النماذج.. امال ايه.. بص فلان بية..ولة شوف فون مش عارف مين اللي بيعمل ايه.. ولا شوف الراجل المشهور بتاع المغني

الفلاني... ما بيشوفش لانه بدل الامور الباقيه بأمور زائله اعمى ما بيشوفش..الملكوت...معلمنا بولس الرسول يقولك غيري ناظرين الى الامور التي ترى..بل الامور التي لا ترى ما تقيمش الحياه بشويه الحاجات اللي انت شايفها دي لا مش هي دي الحياه غير ناظرين الى الأمور التي التى ترى بل الامور التي لا ترى... لان الامور التي ترى فوقتة..واما الامور التي لا ترى فأبديه.... عاوز تقيس الحياه قسها بالامور التي لا ترى... الامور التي لا ترى محتاجه عين تكون مفتوحه عين بالروح. ما يشوفش إيد ربنا في حياته أحبائي..الاعمى ما يشوفش معاملات الله.. احبائي احنا النهارده بنحتفل بتذكار نياحه اليشع النبي.. اليشع النبي في مره من المرات تلميذه جحزى..قال له خلي بالك الجبل كله محاط، واحنا محاصرين جايين يهجموا علينا ..يصلي اليشع لربنا يقول له اكشف يا رب عن عيني الغلام ليبصر ان الذين معنا اكثر من الذين علينا ..يخرج جحزى يلائي الجبل كله محاط بملائكه وقديسين كل الجبل... قال له ايه ده...قالة احنا يا ابني معنا كثير قوي ..معانا كثير جدا بس الكلام ده عاوز عين...اية؟!
عشان كده معلمنا بولس يقول لك مستنيرة هي عيون قلوبكم ..القلب يرى. و في انسان بعيد عنك القلب يبقى

اعمى اصعب عمى عمى القلب..يا عيني عليك يا مسكين واحد زي شمشون، الخطيه عمياة ...دليله تقول له قل لي قوتك فين اخبرني من اين قوتك... يقول لها قوتي لو ربطتوني بأحبال شكلهم ايه.. يروح صابح ثاني يوم يلاقي ناس بيفكوا بالحلال يبقى البنت دي غداره ولا لا؟! يبقى البنت دي أمينه له ..يبقى البنت دي يأتمنها على سر ؟! تجيء بعد كده.. تدلع عليه في مره ثانيه تقول له انت كده برضه تزعلني ... وهي بتهزر؟! وهي مش بتهزر هي عملتها في فعلا وجابت له ناس .ثاني مره يخبرها قوته فين.. برضه بحاجه غلط. تبص تلاقي ايه ..أتوا الية ناس.....فثالث مره يقول لك زهق منها..فقال لها قوتة فى شعرة...يا عيني عليك يا مسكين مش شايف فين الصح من الغلط.؟! . للدرجه دي.. كم مره احبائي نغلط نفس الغلطه؟ وندفع نفس الثمن ونكرر نفس الغلطه ثاني؟!! اقول لك لا خلي بالك لازم العين تبقى مستنيرة ..لازم كده تخيل انت كده لما يبقى ربنا يسوع المسيح قدام كل الناس ومش شايفينه ..ياما بنبقى عاملين زي الكتبه.. والفريسين..ياما نبقى زي الجيل اللى يسوع كان قدامهم ...الى خاصتة جاء وخاصتة لم تقبله.. عشان كده. بدل مايكرموا..اهانوا..بدل ما يمجدوه صلبوه ،بدل ما يتبعه

تركوه بدل ما يعترفوا بفضله عليهم قالوا عليه ده مختل.. هو ده المختل!! ولا انتم المختلين.. قالوا عليه مختل.. وقالوا عليه به شيطانا.. مجنون..
الخطيه تعمل جنون. وتعمل عمى ..
اخر حاجه تعمل ايه بقى..
خرس...ولا يسمع ولا يتكلم ..ولا يسمع صوت ربنا ولا اعرف اميز ربنا عاوز ايه. ولا اعرف اتكلم مع ربنا ..تصور كده لما واحد تقول له صلي يقف يصلي يقول لك اقول ايه.. وانا اقول لك انت تقول ايه.؟!! انت ما فيش عشره بينك وما بين الله؟!! تخيل انت كده لما تكون قاعد مع واحد عمرك ما تعرفه ولا لك اي عشره معه.. تبقى مش عارف تتكلم معها تقول ايه . بس في ناس شطار ..حتى لو قعد مع واحد ما يعرفوش يعرف يفتح حديث يتكلم،، تخيل إحنا يوصل بينا الحال مع ربنا نقف مع ربنا ما نعرفش نتكلم نقول له ايه..
ازى؟!..تقولى اصل اخرس... اقول لك لا لا لا.. ده انا لازم لسانى دة يتفك ...عشان كده معلمنا داود كان يقولة....افتح يا رب شفتيى ليخبر فمي بتسبيحك..اصل انا يا رب ياما اقف قدامك اخرس مش عارف اقول ايه سامحني يا الله.. بس خلي بالك لما تحس كده ان قلبك بقى في حراره الروح تلاقي الكلام مش عارف يقف هو

ده جمال العشره مع الله .يقول لك كده القديسين القول الجميل حينما يفعم القلب بحراره الروح تنفك عقده اللسان.. حينما يفعم القلب بحراره الروح تنفك عقده اللسان اللسان منطلق مش عارف اقول لك ايه ولا ايه يا رب ابارك فيك ايه ولا ايه واعظم فيك ايه ولة اية..واطلب منك ايه ولا ايه واشكرك على ايه ولا ايه واتكلم معك عن ايه ولا عن ايه لما القلب يكون حرارة الروح تلاقي الحديث مع ربنا في ترنيمه تقول لك يجري حديثي معه سرا ولا رقيب اصله الكلام بيجيب بعضه مش انت ممكن تقعد مع واحد حبيبك قوي تكتشف ان انت قاعد معه اربع ساعات وانت مش واخذ بالك اقول لك كده لما نكون احنا قاعدين مع ربنا في عشره جميله تلاقي نفسك بتتكلم عشان كده الاخرس ولا يتكلم ولا بيسمع انذارات...انذارات الله!!!!مايسمعش ..ايات ما يسمعش احداث ما يسمعش واحد حبيبي انتقل مش مشكله زلزال ..مش مشكله ده لو زاد كم درجه بس؟؟ دة في ناس حست ان الدنيا بتلعب بهم طيب يا جماعه الكلام ده كله ايه ده اصوات من اللة...احبائي. بيقولك حياتك في يدي.. انت افتكرت ان انت خلاص عملت كل حاجه..دى تشوف الاسباب العلميه للزلزال دي حاجات غريبه.. يا رب احفظنا ...دى الحكايه ممكن

لحظه..افتكرنا ان الدنيا دايمة ...دى الحكايه ممكن للحظة ولا حاجه ...اخرس ما بيسمعش وما بيتكلمش ولا عارف يعمل حديث مع ربنا ولا عارف يسمع ربنا ولا عارف يوجه كلام الى الله... شوف الخطيئه بتعمل ايه.. بتدمر كل مشاعر الانسان وكل حواس الانسان وكل غالي عند الانسان يكون رخيص وكل رخيص عند الانسان يبقى غالي...اقول لك لا خلي بالك ... حين اذنا احضر اليه مجنون اعمى اخرس فشفاة . حتى ان الاعمى الاخرس تكلم وابصر.. فدهش الجموع كلهم فقالوا..العلا هذا ابن داوود!!! قادر يا رب تشفيني قادر... يا رب ...مهما تسلطت عليا الخطايا ...قادر وان كنت مجنون واهنتك كثير واغضبتك كثير وعملت تصرفات لا تليق..سامحني ..ماانا مجنون.. المجنون ما بيتاخذش عليه..انا هقف امامك يارب وهقول لك ما تاخذش عليا... اقول لك معلش يا رب ان كنت للاثام يا رب من يثبت لان من عندك المغفره.. اعمى هروح لمين غيرك تفتح لي عينا وتخليني اشوف.. اخرس هاقول لك انت يا ربي الذي تفتح شفتيى.. ليس الاموات يباركونك يا رب لكن نحن الاحياء نبارك كل حين.. ربنا احبائي يلمسنا ويشفينا ويجعلنا في عقل متزن نزن الامور ونرى الامور بنظره روحيه ونتكلم مع الله ونسمع الله.. يكمل نقائصنا

ويسند كل ضعف فينا بنعمته ولالهنا المجد الى الابد آمين...