تذكار الاعياد السيدية الكبرى
08 نوفمبر 2026
بسم الآب والأبن والروح القدس الإله الواحد أمين
نعيد في هذا اليوم لتذكار الاعياد السيديه الثلاثه البشاره والميلاد والقيامه الحكايه بتاعه التجسد ان الله يتبنى قضيه الانسان ياخد طبيعه الانسان ويحمل خطايا الانسان ويخلص الانسان ويقيم طبيعته فيه بالقيامه الحكايات دي كلها فوق العقل ولكن تقول ليه كل ده القديس يوحنا قال ايه؟
هكذا احب الله العالم ما تروح ناحيه التفكير والعقل والتحليل يحتار العقل ازي ربنا غير المحوى غير المفحوص اللانهائي اللي مالهوش حدود اللي فوق الزمن يرضى بكل ده ويعمل كل ده فالتفكير يقف لكن المدخل الوحيد ان الله احبنا هكذا احب الله العالم طب العالم ده مليان يعني في البولس اللي اتقرا يقول لك ايه اغلق على الكل كله تحت الخطيه ما فيش حد بار ولا واحد طب احب العالم ده قال اه ونزل اشترك معانا في الطبيعه البشريه خدها قول ليه عشان يشركنا احنا اخد اللي لينا اللي لينا كله وحش واعطانا بحاجته اللي ليه فبقينا احنا بالمسيح يسوع اللي احنا اولاد التراب بقينا اسمنا ابناء الله بسبب ايه؟ بسبب ان ابن الله بقى ابن الانسان فبقى كل واحد فينا يقول لله ابويا ابانا الذي في السماوات فنزول الله لطبيعتنا مش للفكر مش للافكار مش الناس اللي بيدرسوا في اللاهوت و يروحوا في المسائل العويصه الكبيره ابدا ده هو نازل مش من اجل كده من اجل انه يعطينا ذاته
احنا مجتمعين دلوقتي في الكنيسه شويه ناس صغيرين حوالين ايه قال حوالين المسيح عشان
قال عشان يعطينا ذاته فندخل نتناول هو دي المسيحيه بكل بساطه شديده اعطانا ذاته واشترك معنا في الطبيعه البسيطه بتاعتنا الترابيه اللي احنا عارفينها عشان كل واحد فينا يعيش بالمسيح القديس يوحنا في الكاثليكون النهارده يقول ايه اكتب اليكم انا بتكلمكم عشان يبقى لكم شركه معنا اما شركتنا نحن فهي مع الاب وابنه يسوع المسيح عاوز عاوزك تدخل جوه الشركه دي مش حكايه عقلانيه لكن هو المسيح احبنا جدا وبذل ذاته لاجلنا واعطانا ذاته تقول لي ده كتير قوي على ربنا اسمع في اللي انت سمعته دلوقتي في الانجيل الملاك جبرائيل رئيس الملائكه بيقول للست العذراء ايه؟
قال لها ليس شيء غير ممكن لدى الله قالت له ازاي؟ يعني بتقول ان انا احبل واولد وانا مش متجوزه انا ما عنديش راجل فقال لها لا ما تفكريش بالطريقه بتاعه البشر دي ده امر الهي فائق للطبيعه فائق للامور العاديه الطبيعيه اللي يعرفوها الناس ليس شيء غير ممكن لدى الله مافيش مستحيل بقى فاذا ربنا حط في ذهنه في تدبيره الالهي انه يفتقد الانسان الغلبان ده ويقيمه من عثرته ويقيمه من موته ويرفع عنه ظل الموت هل ده مستحيل على الله ابدا يعني ربنا يقدر ايوه طبعا هو قادر على كل شيء فلما اراد ولما دبر الامر ده ما فيش حاجه وقفت في سكته بقى قول ده ربنا قال اه يعني ده الغير محدود غير المحصور غير الزمني قال حط نفسه تحت الزمن هل يستحيل عليه شيء لا فبالفكر ده لازم الواحد واحد يبقى يعني يقرب من الانجيل بالفكر ده هل يستحيل على الله شيء ابدا لما احبنا كسر جميع الحواجز الطبيعيه نزل نزل لضعف الانسان ولطبيعه الانسان وبقى جنين في البطن وبقى بيبي صغير يتشال ده هو اللي شايل الدنيا كلها وبقى يعني الست العذرا بترضعه ده هو اللي بيشبع كل حي عشان كده بقول لك ما فيش مستحيل مافيش مستحيل طب وهل انا ممكن اتحد بالله طبعا امال لم تاكل قال من ياكلني يحي بي من ياكل جسدي ما هو يعني البلوره كلها بتاعه التجسد ان الانسان يتحد الله في سر التناول بالذات من ياكل جسدي ويشرب دمي يثبت فيا يحيا بي فانت تطلع بقى من الكنيسه وانت متناول تقول انا عايش يقوللك ازاي زي از زيك يا فلان يقول عايش يقول لا لا ازيك يقول انا عايش بالمسيح ايه اخبارك يعني رحت فين وجيت منين قول رحت بيه وجيت بيه وبحيا بيه بفكر بيه به احيا واوجد انا من غيره لا لي حياه ولا لي وجود احيا واتحرك واوجد بايه بالمسيح عشان كده بقى الانسان المسيحي اذا اذا عاش غير كده يبقى غلبان يبقى زي بقيه الناس بقى واوحش من بقيه الناس اذا عاش بفكر فكره يبقى غلبان اذا عاش بامكانياته كانسان يبقى غلبان اما يعيش بالمسيح يقول به احيا طب بالواحد مثلا اما حد يسيء اليه لاقي في بعض مننا كده في نعمه حد يسئ اليه تلاقيه يوطي على عاوز يبوس ايده ويبوس رجله زاي انت مش بني ادم يا الواحد الاهانه ديت بتسئ اليه وتتعب له نفسه تعبان متكدر ومتنكد وساعات ما يعرفش ينام لكن تلاقيه ايه وطي بيبوس ايده يقول له يا اخي طب جبت منين الامكانيه الكبيره قوي دي ان الواحد يتجاوز ذاته ويتضع جبتها منين؟ قال من الخير الكتير التجسد ده ايه؟ ده خير كبير جدا الخير
الالهي النعم الالهيه كلها طبع ربنا اعطاه لنا فبقى الانسان بالمسيح بقى يقول احيا واتحرك واوجد ونفذ الوصايا يا عم ده الوصايا تثقيله قال لا ما انا بالمسيح بقى يعني احب اعدائكم باركوا لاعنيكم احسنوا لمبغضيكم صلوا لاجل الذين يسيئون اليكم اعطوا دي وصايا تقيله قال لا لا ده خفيفه جدا لمين للي بيقول انا بحيا بالمسيح انا عايش بالمسيح فتلاقي الوصايا ديت طبيعيه جدا ولذيذه جدا
وعكس الوصايا ديت تبقى حياه كريهه الانسان بذاته بفكره بالانا بالكبرياء البغيضه جدا جدا لان الانسان انا وانا ده بيقع في كل المصايب وجميع المشاكل واحد يقول انا انا ما انا غلبان ده انا انسان ده انا ضعيف ده انا خاطي لكن بالمسيح ان اخطا احد لنا شفيع ايه ده دم يسوع يطهر من كل خطيه فالحياه في المسيح هي الحياه اليوميه المفروض تكون في الاكل والشرب والنوم والمشي والشغل والوظيفه والتعامل مع الناس طب كل ده ازاي قلب المسيح لا احيا لا انا قولها بقى بل المسيح يحيا فيا هو ده تجسد انا مش عايش في ذاتي عايش بذاتي تبقى كل المصايب انا عايش بالمسيح انا بتناول لا احيا لا انا بل المسيح يحيا فيا لربنا المجد الدائم الى الابد أمين.
المتنيح القمص لوقا سيداروس
