كنوز سماوية الأحد الأول من الصوم

بأسم الآب والابن والروح القدس، إله واحد أمين. فلتحل علينا نعمته ورحمته وبركته الآن وكل أوان وإلى دهر، الدهور كلها آمين.
الاحد الأول من الصوم. المقدس تقرأ علينا الكنيسة فصل من بشارة معلمنا متى إصحاح ستة جزء من الموعظة على الجبل جزء من التعاليم الرئيسية والأساسية لربنا يسوع المسيح لأن الكنيسة في الحقيقة فى فترة الصوم المقدس. بتقدم لأبنائها. أغلى وأجمل وأشهى ما عندها. على اعتبار إنهم صايمين عن الأطعمة .فبتعوضهم .على أساس أنهم بيحرموا الجسد عشان يغذو الروح. على أساس إن هما بيقدمو حرمانات كثيرة للجسد على أن يكون في تعويضات كثيرة للروح. أحب. أركز على إن الصوم لابد أن يكون معه تغيير في الحياة في اهتمامات الحياة في برنامج اليوم في تقسيم الوقت، في العلاقات، في الكلام. وإلا يتحول إلى عمل جسدي ثقيل و متعب ويكون الإنسان بيدور على نهايته. ويكون الإنسان ينظر إلى هذه الفترة بأنها جبل..لكن لو الصوم مصحوب بأعمال روحية ولو الصوم في صلوات ولو الصوم يوجد فيه عبادة ولو الصوم يجد فيه تقديم ذبيحة من ارادة. مقبولة بحرمانات يفرضها الإنسان على نفسه من هنا. هيلاقي الصوم له معنى مختلف، فالصوم لا بد أن يكون مسحوب بصلاة .إيه الفايده إن إحنا قاعدين نحرم نفسنا من أصناف إحنا بنميل إليها وبنحبها. وبنقول لجسدنا ماتكلش هذا الأشياء.. لكن مابيصليش لكن مفيش علاقة بالله لكن مفيش غذاء لكلمة الله مفيش شبع بالله يبقى أنا بجوع الجسد وفقط لا أنا مش بجوع الجسد وفقط أنا بجوع الجسد لأنه شبعان بالروح فابتدأ يرضى بجوع الجسد. وابتدأ بجوع الجسد..وابتدا يبحث عن أمور جديدة يقدمها من خلال صومة يفرضها هو على نفسه. القديس العظيم الأنبا انطونيوس. كان يقول. أن الصوم والصلاة عامل زي إنسان الجسد بتاعه. جمرة مشتعلة بالنار. دا الجسد الصائم الجسد الصائم جمرة مشتعلة بالنار..أجمل حاجة للجمرة المشتعلة بالنار تحط عليها إيه بخور.. تحط عليها بخور يحصل له إيه يفوح منه رائحة طيبة كريمة ذكية. تصعد إلى أعلى الجسد الصايم عندما يصلي يكون ريحة صلواته جميلة الجسد الصائم كلما أشتعلت فيه حرارة الروح وكلما الجسد قدم أتعاب أثناء الصوم الريحة. الذكية. تفوح بالأكثر..خد بالك كل ما كانت ال فحمة مشتعلة أكثر أي حاجة تتحط عليها تتحرق. لو حطيت عليها شهوات تتحرق. لكن لو حطيت عليها بخور يطلع منه ريحة جميلة إذا الجسد الصايم يضبط غرائزة وشهواته وطلباتة وجسدياتة..وفي نفس الوقت تغذي بصلوات تطلع منه رائحة كريمة. بدل الجسد إللي بيقدملنا مود بقى بيقدملنا حياة، بدل الجسد الذي يشدنا إلى تحت بقى بيرفعنا لفوق عشان كده أحبائي ..الصوم يريد تغير في منهج اليوم ..كان واحد القدسين يقول لك سليمان الحكيم وموسى النبي عندما بنوا الخيمة والهيكل قلك عملوا مذبحين مذبح برا. بتقدم عليه ذبيحة المحرقة ومذبح جوا إسمه مذبح البخور قالك أهو ده الصوم والصلاة..جسدك برة هودة مذبح المحرقة يتحرق عليه الجسد بالصوم. دا ذبيحة المحرقة يوضع عليها الذبائح الحيوانية ده إيه المذبح إللي برا المذبح إللي برا يدخلك على المذبح إللي جوا إسمه مذبح البخور، مذبح القلب الداخلي، إذا جسدك من برا صايم لكن من. داخل المذبح الداخلي بيرفع صلوات ف. إنت عندك مذبحين في الصوم مذبح بتقدم عليه أتعاب جسد ومذبح بتقدم عليه بخور صلوات نقية مرفوعة أمام الله. هو ده أحبائي روح الصوم، لا بد أن نتحلى بها في هذه الفترة. الصلوات أحبائي التي تكون مصاحبة لاصوامنا هذه التي تعطي للصوم فعل قوي. هي دي أحبائي التى تجعل الصوم رائحتة ذكية ومقبولة متستغربش، لما تلاقي قديسين يقضوا حياتهم كلها صوم لأن الصوم لذة. لم يصبح متعب مبقش تقيل أصبح شهي جدا للنفس. عشان كده أحبائي كل ما الإنسان يستفيد بالصوم كل ما الإنسان الروحي جواة كبر ونمى. كل ما علاقته بربنا ارتفعت وفرحت وابتهجت ...يجي النهاردة يقول لك لا تكنزوا لكم كنوزا على الأرض.. نفس صايمة وبتصلي الأرض دى بالنسبة لها صغيرة جدا. و قليلة جدا. والقنية دى عنده. حاجة بسيطة جدا تكفية و شبعان وراضي وقابل..لا تكنزوا لكم كنوزا على الأرض. مش معقول أحبائي الإنسان يكون صايم وطامع في أمور الدنيا وملكيات الدنيا. لا أبدا. عشان كده. من أجمل الحاجات أحبائي التي تصاحب الصوم. إن يكون في عطاء ورحمه أن يكون الإنسان مترفع عن أمور العالم، والقديس موسى الأسود ..رجل مجاهد يقول لك في حاجة اسمها نسك الجسد وفي حاجة اسمها نسك النفس. النفس لها نسك ؟ أه يعني إيه قالك نسك النفس. هو بغض التنعم...وقالك بغض. الجسد. هو العوز..بمعنى ان تعطية على قدة ....لكن نسك النفس الي هو الإنسان مايحبش مظاهر العالم البراقة الخداعة دى... فإذا الإنسان الصوم بتاعه لا بد أن يكون مصحوب بصلاة.. أعطوا وقت للصلاة أكثر. أقف مع ربنا أكثر غير برنامج اليوم بتاعك بدل ما تقعد قدام التليفزيون كثير. ويمكن يكون الشيطان نصب لنا فخ اليومين دول بالأخبار والتغيرات ... أنا قلت لكم قبل كده ومازلت أقول لكم صعب جدا..نجلس نتابع كل حاجة.. نزعج وصعب قوي نقعد نسمع ونقلق ونقلب على ده وبعدين نقلب على ده وبعدين نقلب على ده. خصص الوقت دا أنك تجلس فيه مع ربنا تتملى بالسلام. و تبص تلاقي حتى المتغيرات إللي حواليك ممكن تكون مش بتتغير بس إنت متغير.. لأن أنت مسنود على إله على صخرة خلاص، على إله قدير قوي إله تاريخ عبر كل الأجيال ليس إله ينجي هكذا وهكذا تلاقي نفسك الأخبار دي بالنسبة لك لم تكن مزعجة بل بالعكس بقت تسمع وتسكت وإذا كان أمر مزعج أوي تحوله إنت إلى صلاة..تبقى إنت مصدر سلام لكل إللي حواليك..اجعل الصوم مصحوب بصلوات طويلة أقف قدام ربنا كثير اتكلم معاه..والجسد الصايم لما يصلي بيبقى عنده دالة عند الله والإنسان الذى قال لجسده لأ. بيلاقي روحة منتصرة ويلاقي روحة مبتهجة جواه، والجسد بيطاوع مش قادر..لانك من الأساس إبتديت إن انت تقوده. وابتديت إن انت ترفعه وبتديت إن إنت ترفعه إزاي تقول له لأ. لا تكنزوا لكم كنوزا على الأرض حيث يفسد السوس والصدأ حيث ينقب السارقون ويسرقون. عاوز يقول لك في كنوز مش بتبوظ مش بتفسد فترة الصوم جمع من الكنز ده جمع حب العطاء حب التخلي حب الطرق حيث لا يفسد سوس من ضمن الأشياء إللي هترفع روحك جدا جدا في فترة الصوم هو حبك للعطاء حتى لو كان داخلك بسيط لكن ميل إن إنت تقول لنفسك لأ واعطى .. واتفرج على نفسك هتلاقي نفس متحررة تلاقيها نفس غالبا تلاقيها صاعدة إلى فوق لأن العالم بالنسبة لها صغير جدا. صغير جدا معدش بيشغلها كثير ولا بقى ليه سلطان عليها دي جمال فترة الصوم أحبائي ..الكنيسة بتقول لك الاحد ده إسمه احد الكنوز.. الكنوز قصده بيها إيه الناس أول ما تسمع كنوز يفتكرو.. في المال والدهب قال لك لأ. بنتكلم عن كنوز تانية الكنوز دي كنوز سمائية كنوز لا ترى كنوز خفية. كنوز يروها الروحانيون فقط...لا تكنزوا لكم كنوزا على الأرض ليه؟ لأن حيث يكون كنزك هناك يكون قلبك.. وابتدا يعلمك يعني إيه يكون عندك كنز لا يفنى يعني إيه إن إنت تكون غني في السماء. مره رجل غني كان. يذهب إلى أب كاهن يعطي له مبلغ من التبرع بعد أسبوع يروح ييعطية مبلغ تاني بعد أسبوع مبلغ تانى...مبالغ كبيرة ف الكاهن. راجع الراجل قال له بقول لك إيه يا عم فلان كثر ألف خير كده كثير وربنا يبارك فيك. الكاهن خشى أن يكون الراجل في حالة عدم اتزان أو تحت تأثير حدث معين ومنفعل وعمال يعطي يعطي وخائف بعد كده إنه يندم ولا حد من ولاده يرجع لابونا يقولة ازى كل دة ...يعنى كثير كثير ورا بعض. قال له يا أبونا أنا عشت غني على الأرض وعايز أعيش غني في السماء. عشت غنى على الأرض عايز أعيش غني في السما. الراجل دا عنده رؤية جديدة للأمور بيعمل عملية تحويل بيكنز له كنوز لا تفسد...بيحول العملة في العملة الروحية مش الجنيه ولا الدولار. لا لا لا هو عارف إن كل حاجة قصادها عملة روحية سماوية تترجم له شفاعة في الملكوت و بتجعله هو يحس بحرية أكثر. عشان كده أحبائي الكنيسة بتحب الصوم بتاعنا وتقعد تقول لنا كتير جدا طوبى للرحم على المساكين قد يكون الإنسان مش قادر يربط. الكنيسة بتكلمنا عن الصوم الصوم، طب إزاي؟ المرد الرئيسي بتاع المديح بتاعها طوبى للرحمة مع المساكين، أصل الصوم لابد أن يكون معاه صلاة ورحمة التلاتة دول أركان بيكملو بعض لأن التلاتة دول بيمثلوا علاقتك بالله و علاقتك بنفسك وعلاقتك بالآخر. علاقتك بالله. ده من خلال الصلاة، علاقتك بنفسك بالصوم علاقتك بالآخر ده الصدقة ...مثلث خلي بالك، أول ما يهتز اى ركن من المثلث يهتزوا الإتنين الثانيين، أول ما علاقتك بالله تضرب تلاقي علاقتك بنفسك مضطربة، تلاقي علاقتك بالآخر مضطربة. كل ما كنت إنت في نمو وثبات مع اللة...اصبحت في نمو وثبات مع نفسك وبقيت في نمو وثبات مع الآخر. تعالي كده تتهز علاقتك بربنا تلاقيك إنت نفسك مش قادر على نفسك ومش حابب نفسك. والآخرين. تلاقيك تعبان من كل الناس. وبتشتكي ..من كل الناس وفاكر ضعفات كل الناس فاكر كل المواقف الصعبة إللي عملوها معاك. الناس ده جاية منين؟ علاقتك بربنا مهزوزة في علاقتك بنفسك اتهزت في علاقتك بالآخر اتهزت عشان كده أحبائي الصوم ده علاج...الصوم ده يعالج الإنسان من أعماقه من جذوره. يصحح مفاهيم ويصحح في الروح إللي جوة. ويبنيها فلما يبني الروح إللي جوا يلاقي إن الجسد خاضع ومطيع...ما أجمل الجسد أحبائي الذي يعطي عشان كده لما ربنا يلاقي قلوب رحيمة يقول لك ياه. عشان كده دي القديس اثانسيوس الرسولى كان يقول لك إن الله يقدر أن يطعم المساكين والفقراء الذين عهد لة بنا. ولكنه يطلب منا. ثمار البر والرحمة والمحبة..هو قادر يطعمهم، فكرك يعني ربنا مش هيقدر يطعم المساكين ولا المحتاجين يقدر، لكن عهدنا بهم قال لنا خدو بالكم من دول ليه؟ لية يا رب جعلت فينا ناس مساكين وجعلتهم يبقوا مسؤوليتنا..عهد لنا ..لية ..لكي يطلب منا ثمار البر والمحبة إذا أحبائي... الصوم لا بد أن يكون معه تغيير في برنامج اليوم لازم يكون في صلوات أكثر. إتفرج على الكنيسة لما تتكلم على الصوم والصلاة لما يقولك الصوم هو إللي رفع إيليا إلى السماء؟ السماء. في سماء من غير صوم ؟ فى ارتفاع من غير صوم؟ . أتفرج على جمال الصوم مع الصلاة. عندما يجعلك ترتفع إلى السماء؟ الأرض تصغر جدا. رفع إيليا إلى السماء الصوم والصلاة... إيليا رجل صوام... ده مرة ظل 40 يوم لم يأكل...فكرك لما يقعد راجل الصوم ده مغروس في حياته بالطريقة دي ولما يكون محب للصلاة. مايترفعش للسماء؟ يترفع للسماء.....الصوم. والصلاة هما الذين خلصا دانيال من جب الأسود الأسود تخضع للصايم ..الذى يصوم ويصلي وحوش كثير بتحاربة تهدأ خلي بالك القديسين يقول لك في أسود مش إللي هي الأسود المتوحشة الحيوانات لأ في أسود كثيرة تحاربنا تريد أن تفترسنا.... ياما في أسود عاوزة تأكلنا أحبائي...ياما فى شر يريد ان يأكلنا... ياما في شهوات عاوزة تبتلعنا وياما في موت عاوزة تسلط علينا وياما في خوف عاوز يقلقنا ..لكن الصوم والصلاة هما.اللى يسدوا أفواه الأسود عايز تغلب الاجواع اللى حواليك اللي ترعبلك الأسود دي؟ قالك بالصوم والصلاة. الصوم والصلاة الذين عمل بهم موسى حتى أخذ الناموس والوصاية المكتوبة بإصبع الله... بالصوم، والصلاة افهم الإنجيل..بالصوم والصلاة تنكشفلى أسرار الشريعة... بالصوم، والصلام آآخذ القصد الإلهي من كل آية. عشان كده واحد من قديسين كان كل ما يلاقي صفر ميفهموش يصوم ويصلي.. ويقعد يقول له يا رب اكشف لي يا رب اكشف لي لحد ما السفر يبقى قدامه كأنه إللي كتبه قعد يفهمة لة.... للدرجة دي أحبائي أقولك جرب في الصوم ده زود صلواتك... متكسلش جرب في الصوم يبقى م هدف جرب في الصوم ده إن يكون معاه بنعمة ربنا تغيير في حياتك. في طريقة تفكيرك في برنامجك اليومي صعب جدا أحبائي إن نكون صايمين وطبعناا هي هى .. وضعفتنا هى هي و الناس إللي مش بنحبهم هما هما وإللي مش بنكلمهم..هما هما وعادتنا هي هي. والكسل. هو هو. ده يبقى صوم تقيل. ميكنش صوم روحاني صوم يعني فرصة صوم يعني نعمة. الصوم الكبير ده أحبائي دة . موسم المطر الروحي ده ربيع السنة. بتاع التخزين مايجيش واحد فى موسم التخزين يبقى كسلان. لأ الذين يزرعون بالدموع يحصدون بالابتهاج...والقديسين قالوا...إن كنت حكيما لا تبدل زمان بزمان مجيش دلوقتي تطلب الراحة. إنت في زمن التعب...وقت الصوم. ده وقت التعب...لا تبدل زمان بزمان يعني دلوقتي ده وقت التعب لا تطلب الراحة في زمن التعب. لئلا. في زمن الراحة الحقيقية يودع النير في عنقك...إللي هو إيه بقى؟ زمن الراحة الحقيقية هو فين الأبدية؟ لا تطلب الراحة في زمان التعب إذا النهاردة ده موسم أشعيا النبي يقول لك أيها الجياع والعطاش هلموا كلوا واشربوا بلا فضة وبلا ذهب تعالو اشتروا لكم خمرا ولبنا...خمرا ولبنا بالمعنى الروح إللي هو الغذاء الروحي دائما الخمر .. في الكتاب المقدس. الفرح الروحي. لا تكنزوا لكم كنوزا على الأرض. هو ده أحبائي فكر الكنيسة للصوم فكر ارتفاع فكر تغيير. الإنسان إللي صايم وبيصلي. ويعمل أعمال رحمة الخطية تستعبدوا؟! الخطية. تتغلب عليه.. ؟! أروع وأجمل ما فى حياة الفضيلة احبائي. إن هي تكون مرتبطة ببعضها جدا الإنسان إللي صايم ويصلي تلاقيه متضع. واللى يصوم ويصلي تلاقيه الفضيلة بتسكن جواه و بتسري في إنسانة الداخلي وتلاقي عمل الرحمة اتولد من جواه مرتاح وتلاقي المحبة جواه صادقة. وتجد الأمور إللي كان ممكن يصعب علية اقتنائها ياخدها بسهولة...الاحد ده إسمه احد الكنوز يلا نجمع كنز لنفسنا منبقاش فقراء وإحنا ولاد الملك منبقاش بنشتكي من الفقر وهو عطلنا مواهب دسمة غنية مشبعة. منبقاش بنشتكي من الفقر والموسم قائم قدامنا. وفاتح الباب قدامنا وبيقولنا تعالو كلو واشربو. ربنا يعطينا أحبائي في هذا الصوم المقدس أن يكون فترة تغيير فترة خلاص وبركة. يمطر علينا ويفيض علينا إلهنا ببركاته السمائية يكمل نقائصنا ويسند كل ضعف فينا بنعمته ولالهنا المجد الى الابد امين....