إستبداد العدو وقوة المسيح الأحد الثالث من بابة

إستبداد العدو وقوة المسيح
بِسْم الآب وَالإِبْن وَالرُّوح القُدُس الإِله الوَاحِد آمِين
فَلْتَحِل عَلِينَا نِعْمِتُه وَبَرَكْتُه الآنْ وَكُلَّ أوَان وَإِلَى دَهْر الدُّهُور كُلَّهَا آمِين
تِقْرَا عَلِينَا الكِنِيسَة فِي هذَا الصَّبَاح المُبَارَك إِنْجِيل الإِنْسَان اللِّي أُحْضِرَ إِلَى يَسُوع أعْمَى مَجْنُون وَأخْرَس .. صِرَاع بَيْنَ مَمْلَكِة الظُّلْمَة وَمَمْلَكِة النُّور .. صِرَاع بَيْنَ العَدُّو وَبَيْنَ الخَالِق .. الصِرَاع دَه المِيدَان بِتَاعُه – المِحْوَر بِتَاعُه – هُوَ النَّفْس البَشَرِيَّة ( الإِنْسَان ) .. الإِنْسَان هُوَ مَحْبُوب الله .. الإِنْسَان اللِّي قَالْ رَبِّنَا أنَا لَذِّتِي فِي بَنِي آدَم ( أم 8 : 31 ) .. الإِنْسَان اللِّي رَبِّنَا خَلْقُه عَلَى صُورْتُه وَمِثَالُه ( تك 1 : 27) .. وَبِالمَجْد وَالكَرَامَة تَوَجَهُ وَعَلَى أعْمَال يَدَيْهِ أقَامَهُ وَكُلَّ شَيْء أخْضَعَهُ تَحْت قَدَمَيْهِ ( مز 8 – مِنْ مَزَامِير بَاكِر ) .
الإِنْسَان دَه مَوْضِع غِيرَة وَحَسَد مِنْ الشَّيْطَان .. الشَّيْطَان عَايِز يِشَوِه صُورِة الإِنْسَان وَعَايِز يِمْتِلِك الإِنْسَان .. عَشَان كِدَه تِلاَقِي إِنْ لَمَّا يِسَيْطَر الشَّيْطَان عَلَى إِنْسَان يِسَيْطَر عَلِيه إِلَى النِّهَايَة وَإِلَى مَا بَعْد النِّهَايَة .. مُسْتَبِد .. تَخَيَّل إِنْتَ اللِّي أُحْضِر إِلِيه أعْمَى مَجْنُون أخْرَس فَشَفَاه .. مُمْكِنْ إِحْنَا نِتْخَيِل أعْمَى يَعْنِي وَاحِد مِشْ بِيشُوف .. مَفِيش شَبَكِيَّة .. عَنْدُه حَاجَة فِي مَرْكَز الإِبْصَار فِي مُخُّه .. لاَ أبَداً .. دَه كَانْ رَاجِل عِينُه سَلِيمَة .. مَجْنُون .. طَيِّبْ لَمَّا شَفَاه لَقِينَاه رَاجِل عَاقِل .. أخْرَس لَقِينَاه بِيِتْكَلِّمْ .. إِيه الحِكَايَة ؟ قَالَّك دَه العَدُّو كَانْ مِسَيْطَر عَلِيه عَشَان كِدَه لَمَّا الشِيطَان خَرَج الرَّاجِل إِبْتَدَى يِتْكَلِّمْ .. إِبْتَدَى يِشُوف .. عَدُو الخِير مُسْتَبِد بِالإِنْسَان جِدّاً .. إِتْكَلِّمْ عَنْ نُقْطِتِين :
1/ إِسْتِبْدَاد العَدُّو .
2/ وَقُوَّة الْمَسِيح .
مُسْتَبِد لاَ يُشْفِق .. لَمَّا يَمْلُك عَلَى نَفْس يُبْقَى عَايِز يَمْتَلِكْهَا وَيَسْتَهْزِئ بِهَا إِلَى النِّهَايَة وَكَأنَّهُ لُون مِنْ ألْوَان التَّحَدِّي لِلخَالِق .. كَأنَّهُ بِيقُولُّه أدِي الإِنْسَان حَبِيبَك .. أدِي الإِنْسَان اللِّي إِنْتَ فَرْحَان بِه .. أدِي صُورَتَك .. تَحَدِّي .. مُسْتَبِد لِدَرَجِة إِنُّه عَايِز يَسْتَهِين وَيِنَكِل بِالإِنْسَان عَلَشَان خَاطِر يُعْلِن قُدَّام رَبِّنَا إِنْ النَّفْس اللِّي إِنْتَ خَلَقْتَهَا عَلَى صُورْتَك وَمِثَالَك لاَ تَسْتَطِيع أنْ تَنْطِق .. وَلاَ تَسْتَطِيع أنْ تَتَعَبَد .. وَلاَ تَسْتَطِيع أنْ تُسَبِّح .. دِي مِلْكِي أنَا .. إِنْتَ بِتْقُول إِنَّهَا مِلْكَك إِنْتَ ؟ .. لاَ .. دِي مِلْكِي أنَا .
عَشَان كِدَه يِقُولَّك الأعْمَى الأخْرَس تَكَلَّمْ وَأبْصَر فَبُهِتَ الكُلَّ .. عَدُو الخِير لَمَّا يَمْلُك عَلَى إِنْسَان يَمْلُك عَلَى مَشَاعْرُه .. عَلَى ذِهْنُه .. عَلَى حَوَاسُه .. عَلَى أفْكَارُه .. يَمْلُك عَلَى تَصَرُّفَاتُه .. يَمْلُك عَلَى الكَيَان كُلُّه .. دَه جَوْهَر عَمَل العَدُّو .. خَلَّى الرَّاجِل مَجْنُون .. خَلاَّه أعْمَى .. خَلاَّه أخْرَس .. تِرُوح تِكْشِفْ عَلَى الرَّاجِل دَه عَنْد وَاحِد دُكْتُور عُيُون تِقُولُّه شُوف لِينَا الرَّاجِل دَه عَنْدُه إِيه ؟ يِقُولَّك مَالُه ؟ تِقُولُّه مِشْ بِيشُوف .. تِعْمِل لُه إِشَارَات تِجِيب لُه ضُوء تِلاَقِيه مِشْ بِيشُوف .. يِكْشِف عَلِيه يِلاَقِيه عُضْوِياً سَلِيم 100 % .. تَعَالَ نِكْشِف عَلِيه فِي حِكَايِة إِنُّه مِشْ بِيِنْطَق تِلاَقِيه عُضْوِياً سَلِيم 100 % .. إِيه الحِكَايَة ؟ العَدُّو إِسْتَطَاع إِنُّه يَتَمَلَّك عَلَى كَيَانُه وَعَلَى حَوَاسُه لِدَرَجِة خَلاَّه عَنْدُه قُدْرَة إِنُّه يِشُوف لكِنْ مَا بِيشُوفْش .. عَنْدُه قُدْرَة يِتْكَلِّمْ لكِنْ مَا بِيتْكَلِمْش .. عَنْدُه قُدْرَة يِفَكَّر وَمَا بِيفَكَرْش .
دَه جَوْهَر عَمَل العَدُّو فِينَا يَا أحِبَّائِي .. يِسْلِب الإِنْسَان عَقْلُه وَبَصِيرْتُه وَفِكْرُه وَنُطْقُه .. يِسْلِب الإِنْسَان أغْلَى مَا يَمْلُك .. أغْلَى مَا يَمْلُك الإِنْسَان إِيه ؟ مَشَاعْرُه .. نُطْقُه .. فِكْرُه .. مَا هُوَ دَه اللِّي يِمَيِّز الإِنْسَان عَنْ بَاقِي المَخْلُوقَات ؟ الإِنْسَان عَاقِل نَاطِق مُفَكِّر .. فَطَالَمَا هُوَ عَاقِل نَاطِق مُفَكِّر فَهُوَ بِيِضْرَبُه فِي الحِتَّة دِي .. فَا يِخَلِّيه مَا يِعْرَفْش يِفَكَّر .. تِقُولِّي إِزَّاي ؟ أقُولَّك هُوَ لَمَّا يِكُون وَاحِد بِيِسْرِع لِهَلاَكُه يُبْقَى دَه كِدَه بِيفَكَّر ؟!! عَشَان كِدَه مُمْكِنْ عَدُو الخِير يِوْصَل بِإِنْسَان إِنُّه يَتَمَادَى مَعَ أفْكَارُه يِخَلِّيه يُحُطْ نَفْسُه فِي نَار .
شُوفْنَا المَجْنُون بِتَاع كُورِة الجِرْجِسِيِّين دَه كَانُوا يُرْبُطُوه بِسَلاَسِل وَيُرْبُط نَفْسُه هُوَ بِسَلاَسِل وَبَعْد كِدَه يِتْفَك مِنْهَا وَبَعْد كِدَه يِجْرِي .. إِيه دَه ؟ إِنْسَان فَاقِد صَوَابُه .. فَقَد عَقْلُه .. الآبَاء القِدِّيسِينْ أجْمَعُوا عَلَى أنَّ الخَطِيَّة هِيَ الجُنُون لأِنْ إِيه هُوَ الجُنُون غِير التَّفْكِير غِير المَنْطِقِي .. وَإِيه هُوَ الجُنُون غِير إِنْ إِنْسَان مُمْكِنْ يِعْمِل تَصَرُّفَات غِير طَبِيعِيَّة .. غِير مَحْسُوب لَهَا .. غِير مَسْئُولَة .. أقُولَّك مَا هِيَّ الخَطِيَّة كِدَه تَصَرُّفَات غِير مَسْئُولَة .. تَصَرُّفَات غِير طَبِيعِيَّة .. الكِبْرِيَاء جُنُون .. الشَّهَوَات جُنُون .. كُون إِنْ الإِنْسَان يِبِيع الأبَدِيَّة بِشِوَيِّة أيَّام عَايِز يَلْهُو بِهَا عَلَى الأرْض عَشَان يُشْبِع شِوَيِّة رَغَبَات وَيَارِيتْهَا تُشْبِع يُبْقَى دَه إِيه ؟ يُبْقَى دَه جُنُون .. جُنُون الخَطِيَّة .
عَشَان كِدَه أقْدَر أقُولَّك إِنْ نَفْس المُعْجِزَة دِي هِيَّ مُعْجِزَة بِتِحْصَل مَعَ رَبَّنَا يَسُوع الْمَسِيح كُلَّ يُوم فِي تُوبِة كُلَّ إِنْسَان خَاطِي .. وَالعَدُّو عَايِز يَمْلُك نِفُوس جِدِيدَة وَرَبِّنَا يَسُوع عَايِز يِشْفِي نِفُوس جِدِيدَة لأِنُّه مَكْتُوب ﴿ لِلرَّبِّ حَرْب مَعَ عَمَالِيق ﴾ ( خر 17 : 16) .. الحَرْب لَمْ تَنْتَهِي وَالشَّيْطَان مَخَلَصْش شُغْلُه وَرَب المَجْد يَسُوع مَخَلَصْش شُغْلُه .. قَالَّك ﴿ أبِي يَعْمَلُ حَتَّى الآنَ وَأنَا أعْمَلُ ﴾ ( يو 5 : 17) ..عَمَّال يُفُك نَاس مِنْ أسْر – أسْر خَطَايَا – يِشْفِي عُقُول مَرِيضَة مَرَضِتْ مِنْ سُلْطَان الخَطِيَّة .. إِكْشِف عَلَى عَقْلَك شُوفُه سَلِيم وَلاَّ لأ ؟ شُوف بِتْفَكَّر صَح وَلاَّ لأ ؟ بِتْفَكَّر فِي الأبَدِيَّة أدْ إِيه ؟ بِتْفَكَّر فِي مَصِيرَك الأبَدِي أدْ إِيه ؟ بِتِرْضِي رَبِّنَا أدْ إِيه ؟ بِتِقْدَر تِقُول لِلغَلَط لأ ؟ لَوْ مِشْ بِتِقْدَر تِقُول لِلغَلَط لأ يُبْقَى إِنْتَ مِشْ بِتْفَكَّر صَح .. تِقُولِّي مِشْ بَعْرَف أقُول لأ .. أقُولَّك يُبْقَى إِنْتَ مِشْ مَالِك إِرَادْتَك .. لَوْ مَا مَلَكْتِش إِرَادْتَك يُبْقَى إِنْتَ مَسْلُوب .
العَدُّو يِعْمِل كِدَه يِسْلِب الإِنْسَان أجْمَل مَا يَمْلُك وَأقْدَس مَا يَمْلُك .. يِضْرَب الإِنْسَان فِي قُدْس أقْدَاسُه .. فِين ؟ فِي عَقْلُه .. فِي حَوَاسُه .. فِي مَشَاعْرُه .. فِي بَصِيرْتُه .. هُوَ دَه جَوْهَر عَمَل العَدُّو .. جَوْهَر عَمَل العَدُّو إِنْ يِخَلِّي الإِنْسَان يُبْقَى لُه عِين وَلاَ يُبْصِر .. يُبْقَى لُه أُذُن وَلاَ يَسْمَع .. يُبْقَى لُه فِكْر وَلاَ يُفَكِّر .. أدِي الجُنُون اللِّي بِيصِيب النَّفْس مِنْ جَرَّاء كَثْرِة الإِثم .. مِنْ جَرَّاء كَثْرِة فِعْل الشُّرُور .. يِسْلِب الإِنْسَان أجْمَل مَا عِنْدُه .. أدِي مُشْكِلِة العَدُّو لَمَّا يِسَيْطَر عَلَى إِنْسَان تِلاَقِي مَا يفَكَرْش صَح .. تِلاَقِي أفْكَارُه مِتْلَغْبَطَة .. تِلاَقِي كُلَّ أُمورُه مَوَازِينْهَا مِشْ مَوْزُونَة صَح .. دَه جَاي مِنِين ؟ جَاي مِنْ إِخْتِلاَل فِي دَاخِل المَوَازِينْ .. جَاي مِنْ إِنْ مُمْكِنْ يِبِيع حَاجَة غَالْيَة جِدّاً بِحَاجَة رِخِيصَة جِدّاً .. حَاجَة قَيِّمَة جِدّاً بِحَاجَة رَدِيئَة جِدّاً .. لَمَّا الإِنْسَان يِبِيع الأبَدِيَّة بِبِضْعِة أزْمِنَة أقُولَّك دَه مِشْ حَاسِبْ الأُمور صَح .. يُبْقَى دَه إِخْتِلاَل فِي العَقْل .
الخَطِيَّة هِيَّ الجُنُون .. مَجْنُون أعْمَى .. إِيه العَمَى ؟ إِنْ يِكُون لُه عِينِين لكِنْ مِشْ شَايِف .. مِنْ حِيث الوَظِيفَة الطَّبِيعِيَّة هُوَ لُه عِينين لكِنْ مِشْ شَايِف .. كَام وَاحِد فِينَا يِقُولَّك أنَا بَقْرَا الإِنْجِيل لكِنْ مَا بَفْهَمْش وَلاَ كِلْمَة .. أقُولَّك دَه عَامِل زَي صَاحِبْنَا الأوَلاَنِي .. العَقْل بِتَاعُه مِشْ مَوْجُود .. طَيِّب لَمَّا بِتِقْرَا أي حَاجَة تَانْيَة لِيه بِتِفْهَم ؟ نِفْرِض إِنْ فِي جُزْء صَعْب نِشُوف الجُزْء اللِّي بَعْدُه .. طَيِّب نِشُوف قِصَّة . طَيِّب نِشُوف رَمْز .. طَيِّب نِشُوف آيَة .. تِلاَقِي الإِنْسَان مِشْ فَاهِم .. مِشْ فَاهِم لِيه ؟ لأِنْ العَدُّو سَيْطَر عَلَى مَرْكَز الفِكْر وَخَلاَّه غِير قَادِر عَلَى أي فِكْر رُوحَانِي وَخَلاَّه يِجِي عَنْد الرُّوحَانِي يُبْقَى بَلِيد .. يُبْقَى فِي سَيْطَرَة مِنْ العَدُّو .. خَلِّي بَالَك .. لأ .. دَه إِنْتَ لَمَّا تِلاَقِي جُزْء مِشْ فَاهْمُه إِفْضَل تَضَّرَع لِرَبِّنَا .
دَه الآبَاء القِدِّيسِينْ كَانْ يِقُولَّك لَمَّا يِلاَقِي جُزْء مِشْ فَاهْمُه يِفْضَل يِصَلِّي لِرَبِّنَا يُطْلُب فَهْم لِدَرَجِة إِنُّه يُطْلُب مِنْ رَبِّنَا إِنْ رَبِّنَا يِبْعَت لُه كَاتِب السِفْر عَشَان يِفَهِّمُه إِيه المَكْتُوب وَيُقْعُد يِبْكِي لَمَّا يِحَاوِل يِفْهَم ..﴿ مُسْتَنِيرَةً عُيُونُ أذْهَانِكُمْ ﴾ ( أف 1 : 18) .. هُوَ عَايِز يِكُون عَنْدُه فِكْر جَاي مِنْ مَصْدَر الفِكْر .. لَمَّا وَاحِد يِقُول أعْمَى مَعْنَاهَا إِنْ فِي حَاجَات شَايِفْهَا لكِنْ هُوَ مِشْ شَايِفْهَا .. فِي حَاجَات قُدَّام عِينُه مِشْ شَايِفْهَا .. أقُولَّك مُمْكِنْ الْمَسِيح يِكُون قُدَّام عِينِيك وَمَا تشُوفْهُوش .. يَامَا بِيِجِي لِينَا فِي صُورِة نَاس نِسَاعِدْهُمْ مِشْ بِنْشُوفْهُمْ .. يَامَا بِيِجِي لِينَا فِي صُورِة فِعْل أوْ حَدَث عَايِز يِخَلِّينَا نِشُوفُه مِنْ خِلاَلُه وَمِشْ بِنْشُوفُه .. مَوْجُود عَلَى المَذْبَح وَعِينِنَا الرُّوحِيَّة مُغْلَقَة .. دَه جَاي مِنِين ؟ جَاي مِنْ إِنْ العَدُّو مِسَيْطَر مِخَلِّي الحَوَاس بِتَاعِتْنَا شَكْلَهَا شَغَّال لكِنْ فِي جَوْهَرْهَا مِشْ شَغَّالَة .
مَجْنُون أعْمَى أخْرَس .. الخَرَس مَعْنَاه وَاحِد مِشْ عَارِف يِتْكَلِّمْ .. وَاحِد مِشْ عَارِف يِنْطَق . تِسْمَع وَاحِد يِقُولَّك أأقَفْ أصَلِّي مِشْ بَلاَقِي كَلاَم .. مِشْ بَعْرَف أتْكَلِّمْ .. وَلَوْ إِتْكَلِّمْت أتْكَلِّمْ وَأنَا مِشْ فَاهِمْ .. وَلأِنِّي صَلِّيت وَأنَا مِشْ فَاهِمْ فَا أحَاوِل أخْتِم الصَّلاَة .. فَيَتَسَائَل إِنْ الصَّلاَة دِي مِشْ مَقْبُولَة يُبْقَى أنَا بَلاَش أصَلِّي أحْسَن .. إِيه دَه ؟ دَه سَيْطَرِة العَدُّو عَلَى نُطْق الإِنْسَان .. وَعَلَى فَهْم الإِنْسَان ..وَعَلَى حَوَاس الإِنْسَان عَشَان تَزْدَاد الفَجْوَة .. عَشَان الإِنْسَان يِبْعِد أكْثَر وَأكْثَر .طَيِّب إِيه المَطْلُوب ؟ لَمَّا ألاَقِي نَفْسِي مِشْ عَارِف أنْطَق أرْشِم الصَّلِيب عَلَى شَفَتَيَّ .. مُعَلِّمْنَا دَاوُد النَّبِي كَانْ يِقُول كِدَه ﴿ يَارَبُّ افْتَحْ شَفَتَيَّ فَيُخْبِرَ فَمِي بِتَسْبِيحَك ﴾ ( مز 51 : 15) .. مِشْ عَارِف أتْكَلِّمْ لِسَانِي مَرْبُوط .. أنَا بَجِي أتْكَلِّمْ بَلاَقِي شَفَايْفِي مُغْلَقَة .. مِينْ اللِّي يِفْتَحْهَا ؟ إِنْتَ اللِّي تِفْتَحْهَا .. إِنْتَ اللِّي تخَلِّينِي أعْرَف أتْكَلِّمْ مَعَاك 10 دَقَايِق .. ½ سَاعَة .. سَاعَة .. سَاعْتِين .. ﴿ يَارَبُّ افْتَحْ شَفَتَيَّ فَيُخْبِرَ فَمِي بِتَسْبِيحَك ﴾ .. عَشَان كِدَه المَزْمُور يِقُول ﴿ لَيْسَ الأمْوَاتُ يُسَبِّحُونَ الرَّبِّ ﴾ ( مز 115 : 17) .. الأمْوَات هُمَّ إِيه ؟ الأمْوَات بِالذُّنُوب وَالخَطَايَا .. مَيِعْرَفْش يِفْتَح فَمُه يِسَبَّح .. يُقَفْ فِي الكِنِيسَة النَّاس كُلَّهَا بِتْسَبَّح وَهُوَ وَاقِفْ .. مِشْ يِقُول .. إِيه مِشْ عَايِز يِقُول .. مِشْ مِتْجَاوِب .. جَاي مِنِين ؟ جَاي مِنْ إِنْ اللِّسَان مَضْبُوط .. جَاي مِنْ إِنْ اللِّسَان مَرْبُوط .. مِنِين ؟ مِنْ كَثْرِة الخُضُوع لِلعَدُّو يِسْلِب الإِنْسَان النُطْق الرُّوحِي .. يِخَلِّي مَفِيش تَسْبِيح .. لكِنْ القَلْب لَمَّا يِتْحَرِّك يَعْمَل الرُّوح .. إِتْفَرَّج بَقَى .
القِدِيس أُوغُسْطِينُوس يِقُولَّك كِدَه ﴿ حِينَمَا يُفَعَّمْ القَلْب بِحَرَارِة الرُّوح تَنْفَك عُقْدَة اللِّسَان ﴾ .. وَبِحَسَبْ تَعْبِير الكِنِيسَة يِقُولَّك * تَعْلِيَات الله فِي حَنَاجِرْهُمْ * .. جَاي مِنِين ؟ جَاي مِنْ قَلْب مُفَعَمْ بِالرُّوح فَتِلاَقِي الكَلاَم طَالِع مِشْ بِمُجَرَّد لِسَان .. لأ .. مَجْنُون أعْمَى أخْرَس .. إِيه اللِّي بِيخَلِّي الوَاحِد يُقَفْ مِشْ بِيلاَقِي كَلاَم قُدَّام رَبِّنَا ؟ دَه إِنْتَ إِتْكَلِّمْ عَنْ تُوبْتَك .. وَاتْكَلِّمْ عَنْ تَسْبِيحُه .. وَتكَلِّمُه عَنْ عَظَمْتُه .. أُطْلُب عَنْ الآخَرِينْ .. دَه إِنْتَ تِوْصَل لِلدَّرَجَة إِنَّك مِشْ تِقُول مِشْ لاَقِي كَلاَم لكِنَّك تِقُول مِشْ عَارِف أوَقَفْ الكَلاَم .. مَجَرَبْتِش تُقْعُد مَعَ وَاحِد غَالِي عَلِيك تِتْكَلِّمْ مَعَاه سَاعَات وَالوَقْت يِعَدِّي وَتقُول الوَقْت عَدَّى بِسُرْعَة .. كُلَّ مَا تُدْخُل النَّفْس فِي عِشْرَة أجْمَل كُلَّ مَا تُدْخُل فِي وَقْفَة أطْوَل .. وَكُلَّ مَا تِتْكَلِّمْ بِمَشَاعِر أجْمَل .. وَكُلَّ مَا تِتْكَلِّمْ بِكَلاَم يِفَرَّحَك أكْثَر وَيُسْكُنْ جُوَاك وَيُغْنِيك وَيِشَبَّعَك .
الأخْرَس شُفِي .. لِيه ؟ وَقَفْ قُدَّامُه .. هُوَ اللِّي فَكْ العُقْدَة بِتَاعِت لِسَانُه .. هُوَ اللِّي عَلِّمُه يِقُول إِيه .. هُوَ اللِّي أعْطَى لُه لِسَان تَسْبِيح .. عَشَان كِدَه يِقُولَّك يُعْطِي لَك لِسَان تَسْبِيح عِوَض عَنْ الرُّوح اليَائِسَة .. يِفُك عُقْدِة اللِّسَان .. عَشَان كِدَه مُعَلِّمْنَا دَاوُد لَمَّا يِقُولَّك ﴿ عَلَى أنْهَار بَابِل هُنَاك جَلَسْنَا .. بَكِينَا عِنْدَمَا تَذَكَّرْنَا صِهْيُون .. عَلَي الصَّفْصَاف فِي وَسَطْهَا عَلَّقْنَا قِيثَارَاتْنَا ﴾ .. لِيه ؟ مِشْ عَارِف يِتْكَلِّمْ .. لِيه ؟ مَسْبِي .. قَالُوا لَهُ رَنِّم لِينَا تَرْنِيمَة .. حَاوِل يِرَنِمْ لكِنْ مِشْ عَارِف فَقَالَ لَهُمْ ﴿ كَيْفَ نُرَنِّمُ تَرْنِيمَة الرَّبَّ فِي أرْضٍ غَرِيبَة ؟ ﴾ ( مز 137 : 1 – 2 ؛ 4 ) .الإِنْسَان المَسْبِي بِالخَطَايَا صَعْب جِدّاً يِكُون فِيه عِشْرَة بِينُه وَبِين رَبِّنَا .. فَكْ الرُّبَاط دَه .. إِتْحَل مِنْ القُيُود .. قَالُّه ﴿ إِنْحَلِّي مِنْ رُبُطِ عُنُقِكِ ﴾ ( أش 52 : 2 ) .
هُوَ دَه الفِكْر اللِّي الكِنِيسَة عَاوْزَه .. تِقُولَّك النَّهَارْدَة إِنْتَ وَاقِفْ قُدَّام مِين ؟ حَالْتَك هِيَّ دِي وَصَلْت إِنْ إِنْتَ مَجْنُون مِشْ عَارِف تُقَيِّم الأُمور صَح ؟!! إِبْتَدِيت تِسْعَى وَرَاء المَادِيَات أكْثَر مِنْ الرُّوحِيَات ؟!! إِبْتَدِيت تِشْتِرِي الأرْض بَدَل السَّمَاء ؟!! إِبْتَدِيت تِحِب الشَّر أكْثَر مِنْ الفَضِيلَة ؟!! .. دَه الجُنُون .. أعْمَى مِشْ شَايِف قُدَّام عِينِيك .. مِشْ شَايِف البِر .. مِشْ شَايِف التَّقْوَى .. مِشْ شَايِف الْمَسِيح .. أخْرَس مِشْ عَارِف تِصَلِّي .. مِشْ عَارِف تِتْكَلِّمْ كِلْمَة تِبْنِي .. مِشْ عَارِف تِصَالِح إِتْنِين .. مِشْ عَارِف وَاحِد يُبْقَى غَضْبَان تِهَدِّيه .
وَصَلْت لِلحَالَة دِي يِقُولَّك ﴿ أُحْضِرَ إِلَيْهِ ﴾ ( مت 12 : 22 ) .. وَصَلْت لِلحَالَة المَأسُوف عَلِيهَا دِي إِتْقَدِّم إِلِيه .. أأقَفْ قُدَّامُه .. مِشْ مَطْلُوب مِنَّك غِير إِنَّك تِكْشِف جِرَاحَاتَك لِلطَّبِيب وَهُوَ يِشْفِيك .. إِعْرِض نَفْسَك عَلِيه .. مِحْتَاج تِشُوف لَك طَبِيب مَاهِر .. مِحْتَاج تُقَفْ قُدَّامُه بِوَضْعَك دَه .. مُجَرَّد تُقَفْ قُدَّامُه فِي حَالِة صَمْت وَانْكِسَار وَطَلَبْ شِفَاء إِنْتَ تِصْعَب عَلِيه يِتْحَنِّنْ عَلِيك وَيِفُك عُقْدِة لِسَانَك وَيِرَجَع لَك بَصِيرْتَك وَيِرَجَع لَك عَقْلَك المَفْقُود المَسْبِي .
عَشَان كِدَه لَمَّا إِتْقَدِّم الْمَسِيح بِسُلْطَانُه قَالْ لِلشِيطَان أُخْرُج .. وَالآبَاء القِدِّيسِينْ لَمَّا يَتَلَذَّذُوا بِالكِتَاب المُقَدَّس يِحِبُّوا يِجِيبُوا المَعَانِي بِاللُغَة اليُونَانِيَّة وَبَعْدِين يِشُوفُوا مَدْلُولاَتْهَا .. يِقُولَّك كَلِمَة * أُخْرُج * مَا كَنِتْش مُجَرَّد * أُخْرُج * .. دَه زَي وَاحِد بِيُكْرُش وَاحِد بِعُنْف .. فِي فَرْق لَمَّا أقُول لِوَاحِد * أُخْرُج * عَنْ لَمَّا أقُولُّه * إِتْفَضَّل إِطْلَع بَرَّه * .. فِي فَرْق فِي اللَهْجَة .. فِي الأُسْلُوب .. فِي المَعْنَى .. الْمَسِيح بِيقُولُّه أُخْرُج بِسُلْطَان .. مِشْ بِيِتْحَايِل .. مِشْ بِيِتْفَاوِض .. مِشْ بِيقُولُّه لَوْ سَمَحْت .. لأ .. دَه بِيقُولُّه أُخْرُج بِسُلْطَان .
حَلْ كُلَّ أُمورِي فِي إِيدُه هُوَ .. كَلِمَة مِنُّه تِشْفِي .. كَلِمَة مِنُّه تِحِل رَبَاطَات .. كَلِمَة مِنُّه تِخَلِّي العَدُّو اللِّي طِمِع فِيَّ وَامْتَلَكْنِي وَاتْصَارِع عَلَيَّ وَغَلَب هُوَ يِنْهِزِم وَيَتَرَاجَع .. عَشَان كِدَه صِرَاع الله وَالعَدُّو عَلَى النَّفْس صِرَاع عَنِيف جِدّاً مُنْذُ بِدَايِة الخَلِيقَة وَإِلَى اليُّوم .. الشِيطَان يِحَاوِل أنْ يَمْتَلِك النَّفْس وَلَمَّا يَمْتَلِكْهَا يِذِلَهَا وَيِسْلِبْهَا أغْلَى وَأجْمَل مَا تَمْلُك .. يِجِي رَب المَجْد يَسُوع يِقُولُّه .. لاَ .. دَه بِتَاعِي أنَا .. يُكْرُش بِقُوَّة .. بِجَبَرُوت .. بِسُلْطَان .. بِكَلِمَة .. التَّانِي يِتْخِزِي .. لِيه ؟ لأِنُّه عَارِف إِنْ هُوَ حَرَامِي .. وَعَارِف إِنْ دَه مِشْ مَكَانُه .. وَعَارِف اللِّي عَمَلُه دَه مِشْ مِنْ حَقُّه ..وَعَارِف إِنُّه مِشْ حَا يِقْدَر يِثْبَت قُدَّامُه لأِنْ دَه الخَالِق .. وَدَه القَوِي هُوَ اللِّي قَادِر اللِّي هُوَ نَفْسُه يُلْقِيه فِي بُحِيرَة .. هُوَ قَادِر إِنْ هُوَ يُهْلِكُه هُوَ نَفْسُه .. فَيِقُولُّه أُخْرُج فَيُخْرُج .
إِنْتَ مَعَاك قُوَّة جَبَّارَة المَفْرُوض تِقُولُّه ﴿ إِلهْنَا مَلْجَأنَا وَقُوَّتْنَا ﴾ ( مز 45 – مِنْ مَزَامِير الثَّالِثَة ) .. إِنْتَ لاَزِم تِكُون وَاثِق مِنْ قُدْرِتُه عَلَى الشِّفَاء اللاَنِهَائِيَّة .. غِير مَحْدُودَة .. لِيه فِيك رُوح ضَعْف ؟لِيه حَاسِس إِنْ الأُمور بِتَاعْتَك هِيَّ كِدَه وَحَا تِفْضَل كِدَه وَمَفِيش حَلْ .. وَأنَا جَرَّبْت لاَ عَارِف أصَلِّي وَلاَ عَارِف أعِيش فَضِيلَة وَجُوَايَا رَغْبَة إِنْ أنَا أتْحَسِنْ بِس مِشْ مُمْكِنْ وَمِشْ حَا يِحْصَل .. أقُولَّك لِيه ؟لِيه وَإِنْتَ فِي إِيدَك صَلِيب ؟!! لِيه وَإِنْتَ مُمْكِنْ تِنْطَق بِإِسْم يَسُوع ؟!! دَه إِسْم يَسُوع مُرْعِب .. دَه صَار أسْمَاء القِدِّيسِينْ اللِّي أرْضُوه مُرْعِب لِعَدُو الخِير فَكَمْ يَكُون إِسْم يَسُوع نَفْسُه ؟!! لِيه تُبْقَى إِنْتَ مَعَاك مَخَازِن لأِسْلِحَة إِلهِيَّة وَلِيه تُبْقَى عَايِش خَاضِع لِعَدُو ضَعِيف مَهْزُوم ؟!! .. لِيه ؟
عَشَان كِدَه قَالَ لَهُ أُخْرُج .. فَلاَقِينَا الأعْمَى شَاف وَالأخْرَس إِتْكَلِّمْ وَاللِّي كَانْ مَجْنُون لَقِينَاه فِي صُورَة مُتَعَقِّلَة .. نِقُول مَعْقُولَة هُوَ دَه ؟!! يِقُول آه هُوَ دَه .. يَا لِشَرَاسِة العَدُّو .. يَا لِشَرَاسِة العَدُّو اللِّي سَلَبِت الإِنْسَان كَرَامْتُه وَلاَزَالَتْ تِسْلِب الإِنْسَان كَرَامْتُه .. لَمَّا تشُوف نَفْسَك فِي حَالِة خُضُوع لأِعْمَال العَدُّو .. وَلَمَّا تشُوف نَفْسَك فِي حَالِة خُضُوع لِلوَصَايَا الإِلهِيَّة تِلاَقِي حَتَّى صُورْتَك إِخْتَلَفِت .. حَتَّى مَلاَمْحَك إِخْتَلَفِت .. صُوتَك إِخْتَلَف .. رُدُود أفْعَالَك إِخْتَلَفِت .. مَشَاعْرَك إِخْتَلَفِت .. كُلَّ شِئ .. لِيه ؟ لأِنْ كُلَّ حَاجَة رِجْعِت مَكَانْهَا .. لأِنْ إِنْتَ إِبْتَدِيت تِعِيش بِحَسَب الحَقَّ الإِلهِي وَبِحَسَب الصُورَة الإِلهِيَّة وَبِحَسَب صُورِة خَالِقَك .. وَابْتَدِيت تُمَجِّد إِلهَك اللِّي خَلَقَك مِنْ أجْلُه .. القِدِيس أُوغُسْطِينُوس كَانْ يِقُول لِرَبِّنَا كِدَه ﴿ خَلَقْتَنَا يَارَبُّ لَكَ فَلاَ وَلَنْ تَطْمَئِنْ نِفُوسْنَا إِلاَّ بِالحَيَاة مَعَك ﴾ .
أدِي الإِنْسَان اللِّي يُؤمِنْ بِقُوِّة الْمَسِيح .. تُؤمِنْ بِقُوِّة الْمَسِيح فِي حَيَاتَك إِنَّهَا قَادِرَة إِنْ هِيَّ تِغَيَّر .. قَادِرَة تُرُد إِلِيك كُلَّ مَا سُلِب مِنَّك وَتِرَجَع لَك المَفْقُود أزْيَد مِمَّا كَانْ .. تُعْطِيك نِعْمِة التَّسْبِيح وَنِعْمِة الرُؤيَة .. وَتُعْطِيك نِعْمِة العَقْل وَالقُدْرَة عَلَى التَمْيِيز بَيْنَ الأُمور المُتَخَالِفَة .. دَه عَمَل الْمَسِيح فِي الحَيَاة .. كُون إِنْ الإِنْسَان يِسَلِّم نَفْسُه لِلعَدُّو بِيَأس يُبْقَى إِنْتَ مِشْ عَارِف قُدْرِة إِلهَك .. يُبْقَى إِنْتَ مِشْ مُدْرِك هُوَ قَادِر يِعْمِل فِيك إِيه .. إِنْتَ لَوْ قُلْت دِلْوَقْتِي يَارَب أنَا ضَعِيف .. إِنْتَ اللِّي قَادِر تِغَيَّرْنِي .. أنَا بَلْتِجِئ إِلِيك بِكُلَّ ضَعْفِي .. بَلْقِي كُلَّ هَمِّي عَلِيك .. أنَا بَقُولَّك يَارَب إِنْتَ قُوَّتِي وَتَسْبِحَتِي .. أنْتَ مُعِينِي .. أنْتَ يَارَب اللِّي مُخَلِّص نَفْسِي .. إِقْتَرِب إِلَى نَفْسِي وَفُكَّهَا .. إِقْتَرِب إِلَى لِسَانِي المَرْبُوط وَإِنْتَ اللِّي تِفُكُّه ..إِقْتَرِب إِلَى عَقْلِي اللِّي إِتْشَل وَإِنْتَ اللِّي قَادِر تُرُد لُه التَّفْكِير السَلِيم .. إِقْتَرِب إِلَى بَصِيرْتِي وَاكْشِف لَهَا عَجَائِب وَاعْطِيهَا نِعْمَة عَشَان تِشُوفَك .. تِلاَقِي فِي قُوَّة دَخَلِت .
لَوْ وَاحِد عَامِل فِتِو يُدْخُل بِيت وَيِرُوح رَابِط كُلَّ اللِّي فِيه وَيِرُوح مِنَزِل كُلَّ العَفْش وَيِسْأل النَّاس وَهِيَّ مَرْبُوطَة فِين الدَّهَبْ ؟ النَّاس مَعَ الخُوف يِشَاورُوا لُه وَيِذِلُّهُمْ وَيِضْرَبْهُمْ وَيِمْنَع عَنْهُمْ الأكْل .. تَخَيَّل لَوْ وَاحِد لُه مَرْكَز كِبِير مُجَرَّد يُدْخُل يِشُوف المَنْظَر دَه كُلَّ حَاجَة تِتْغَيَّر .. الرَّاجِل المُسْتَبِد دَه خَلاَص تِلاَقِي فِي إِيدُه كَلاَبْشَات .. أصْغَر عَسْكَرِي مُمْكِنْ يِضْرَبُه .. فِين الحَاجَة اللِّي خَدْتَهَا ؟ يِقُول فِي المَكَان الفُلاَنِي .. يِرَجَع كُلَّ حَاجَة مَكَانْهَا وَيَعْتَذِر لِلنَّاس اللِّي عَمَل فِيهُمْ كِدَه وَيِرُوح وَيِتْسِجِن .
هُوَ دَه الصِرَاع اللِّي بِينْ رَبِّنَا وَبِينْ العَدُّو .. تَخَيَّل حَالِة السَلْب وَالنَهْب اللِّي إِنْتَ عَايِش فِيهَا دِي تَخَيَّل لَمَّا تُبْقَى رَاضِي عَنْهَا .. تَخَيَّل لَمَّا تِكُون قَاعِد تَصَالَحْت مَعَ سَالِبَك .. تَخَيَّل أي حَاجَة تِقُولُّه عَلِيهَا حَاضِر .. الله لَمْ يَخْلِقْنَا لِنَهْلَك وَلَمْ يَخْلِقْنَا لِكَيْ مَا نُوضَع فِي يَدْ أعْدَائْنَا وَلكِنْ هُوَ خَلَقْنَا لِكَيْ مَا نَكُون لَهُ .
﴿ حِينَئِذٍ أُحْضِرَ إِلَيْهِ مَجْنُون أعْمَى وَأخْرَس ﴾ ( مت 12 : 22 ) .. كُلَّ وَاحِد فِينَا النِّهَارْدَة وَاقِفْ قُدَّامُه يِقُولُّه حَالْتِي لاَ تَخْتَلِف كَثِيراً عَنْ المَجْنُون الأعْمَى الأخْرَس دَه .. الرَّاجِل دَه اللِّي مَسْلُوب كُلَّ شِئ تَقْرِيباً أنَا زَيُّه .. أنَا طَاوِعْت شَهَوَاتِي إِلَى النِّهَايَة أفْقَدِتْنِي قُدْرَات كِتِير .. أنَا وَصَلْت لِدَرَجَة مِنْ الإِخْتِلاَل العَقْلِي .. المَوَازِين بِتَاعْتِي مِشْ مَظْبُوطَة .. أنَا مِشْ عَارِف أسَبِّحَك وَلاَ عَارِف أفْهَمَك وَلاَ عَارِف أفْهَم فَضَايْلَك .. دَه أنَا بَقِيت أقُول عَلَى النَّاس اللِّي بِيِعْمِلُوا فَضِيلْتَك دُول نَاس مِشْ مُتَعَقِلِين .. دَه أنَا اللِّي مِشْ مُتَعَقِل .. أأقَفْ قُدَّامُه مُجَرَّد بَسْ إِنُّه يُحْضَر إِلِيه يِقُولَّك فَشَفَاه حَتَّى أنَّ الأعْمَى الأخْرَس تَكَلَّمْ وَأبْصَر ( مت 12 : 22 ) .
رَبِّنَا يِدِّينَا أنْ نَلْمَس قُوَّة الْمَسِيح فِي حَيَاتْنَا
وَأنْ نِتَضَايَق مِنْ إِسْتِبْدَاد العَدُّو
وَأنَّ كُلَّ مَا إِزْدَاد إِسْتِبْدَادُه لِينَا كُلَّ مَا زَاد صُرَاخْنَا لِلقَادِر أنْ يُخَلِّصْنَا
رَبِّنَا يِكَمِّل نَقَائِصْنَا وَيِسْنِد كُلَّ ضَعْف فِينَا بِنِعْمِتُه
وَلإِلهْنَا المَجْد دَائِماً أبَدِيّاً آمِين