دفعه الي امه

دفعة الى امة

باسم الأب والابن والروح القدس اله واحد امين
تقرأ علينا الكنيسة احبائي في هذا الصباح المبارك فصل من انجيل معلمنا لوقا
معجزه من معجزات ربنا والهنا ومخلصنا ربنا يسوع المسيح اقامه ابن ارمله نايين
ربنا يسوع صنع معجزات عديده كان كل معجزه لها هدف
صنع معجزات اقامه موتى عشان يعلن سلطانة على الموت ..صنع معجزات اخراج شياطين عشان يعلن سلطانة على الشياطين صنع معجزات شفاء مرضى لكي يعلن سلطانة على الخطيه وعلى المرض صنع معجزات عشان خاطر يتسلط على الطبيعه زي ما اشبع الجموع وسكت الرياح دي معجزات سلطان على طبيعه
يعني سلطان على طبيعه.. سلطان على الموت ...سلطان على الشيطان... سلطان على الخطيه ...سلطان على المرض ...يعني معجزه ربنا يسوع المسيح مش مجرد معجزه لا ...دى بتعالج حاجات من حاجات سقطت ادم الشيطان سيطر عليه جاء المسيح يسيطر على الشيطان ادم الفساد دخل طبيعته المسيح جاء عشان خاطر

يشفي الامراض ..ادم الخطيه دخلت جواة..المسيح جاء عشان خاطر يشفي المرض... ادم اللي اتحكم علية بالموت زي ما قال...يوم ان تأكل من الشجره موتا تموت فجاء المسيح يعلن سلطانه على الموت الطبيعه نفسها تمردت زي ما بيقول معلمنا بولس الرسول اذا اخضعت الخليقه للباطل المسيح جاي يخضعها علي الرجاء في شخصة هو ..عشان كده احبائي
كل معجزه من معجزات ربنا يسوع المسيح كان لها هدف ابعد من مجرد المعجزه
معجزة النهارده من ضمن معجزات اقامه الموتى كلنا عارفين ان ربنا يسوع المسيح اقام ثلاث موته
١// معجزه اقامه لعازر ... اكثر معجزة معروفه
٢//إقامة ابن ارمله نايين
٣//إقامة ابن قائد المئه
احنا احبائي النهارده بنتكلم علي معجزه معروفه
ابن ارمله نايين.... ست ارمله وحيده خارجين بالنعش بتاع ابنها ...الجنازه طلعت
كانت دايما المقابر بتكون خارج المدن
فتقابل معاها الرب عند باب المدينه نايين على اساس ان هما رايحين يدفنوا الولد
المسيح داخل لمدينه نايين...وهما طالعين من مدينه

نايين... وقف يسوع على جنب لحد ما يعدوا ...عدي الناس و ربنا يسوع المسيح شاف الام بتبكي فصعبت عليه ... وقف الجنازه ثم لمس النعش... وقال ايها الصبي لك اقول كم فقام ....عشان كده احبائي المعجزه بتاعه النهارده
بتعلن سلطان ربنا يسوع المسيح على الموت لانه هو رئيس الحياه
هنتكلم شويه النهارده مش عن المعجزه لكن عايز اكلمكم عن الام ...مين الام اللي بتبكي على موت ابنها مين الام اللي في الاخر لما ربنا يسوع المسيح اقام الولد ودفعهة الى امه.. في الحقيقه احبائى..ان الاباء القديسين يقولوا ان الام دي هي الكنيسه
الام هي الكنيسه اللي بتبكي على اولادها الاموات....الأموات بالنسبه للكنيسه مش اللي عايشين بالجسد لا ...هما الاموات بالذنوب والخطايا
الاموات بالنسبة للكنيسة هما المنصرفين عن الكنيسه
الكنيسة بتعمل ايه عليهم؟بتبكي عليهم انا عايزك تتخيل معايا ان الكنيسه دي اللى انت بتحبها هي بتحبك اكثر منك... هي اللي ولدتك وهي اللي تربيك و هي اللي تعلمك وتغذيك لغايه لما تزفك للمسيح في اخر لحظه في حياتك وتصلي عليك وتقرا لك تحليل

قبل ما تخرج منها
الكنيسه تشفع في اولادها..نلاحظ كدة
الشخص وهو في صندوق الكنيسه تقول له اغفر لها جميع خطاياها التي صنعتها بمعرفه وبغير معرفة لانك انت تعرف ضعف البشريه ونقصها ...يعني عماله تشفع في الشخص لحد ما مات... ايه رجاء الكنيسه؟ مش حزينه على أن الشخص انتقل .. لا ...هي الكنيسه فرحانه مش زعلانه لكن زعلانه امتى؟؟
ثلاث حاجات يزعلوا الكنيسه قوي قوى
اول حاجه عدم التوبة تخلي الكنيسه حزينه على اولادها جدا كل ابن من ولادها مصمم يعيش في الخطيه باسرار الكنيسه بتبكي عليه روتينيه وشكلية العباده الكنيسه تبكي على اولادها المقسومين.. بقلبها
١// عدم التوبه
٢/ روتينيه العباده او شكلية العبادة
٣/الكراهيه والانقسام
١///عدم التوبه لما يكون في الكنيسه ناس مصممه تعمل خطايا ولا تستجيب لندائات التوبه ابدا ولا يتحرك قلبها بل تزداد في الخطية... بل تتفنن في الخطايا بل تتحدى الله والكنيسه هنا عماله تعمل ايه ؟تبكى... اكيد كلكم شفتم ام بتبكي على ابنها عشان ما

بيسمعش كلامها عشان ماشي مع ناس مش كويسين عشان ما بيذاكرش عشان ما بيفتحش كتاب .. عشان شايفاه بيضيع من قدامها وهي عماله تتحايل عليه... ومش سامع كلامها ابدا...هنا ساعتها قلبها بيكون مكسور والدموع ما تفارقهاش و عماله تبكي على ابنها
الكنيسه احبائي صدقوني نفس الوضع نفس الوضع الكنيسه بالنسبه لنا لما بنكون في حاله اسرار على الخطية. في فرق كبير بين االلى مصمم على الخطيه وبين اللي ضعيف ويغلط ويتوب.. عشان كده احبائي حتى لو كنا ضعفاء ...حتى لو كنا خطاة لكن نكون بنندم على خطايانا ورافضيين خطايانا وبنتوب عن خطايانا وبستمرار ما عندناش غير كلمه يا رب ارحمنا ..باستمرار نقول له أنعم لنا بغفران خطايانا باستمرار نقول له كيرياليسون ..اكثر كلمة الكنيسه تحطها في افواه اولادها تعلمها لهم من وهما رضع
أكتر كلمه الكنيسه تحب تسمعها من ولادها كلمه كيرياليسون يا رب ارحم سمعها للكنيسه كثير زي بالضبط الابن اللي يروح يقول لامه انا اسف معنى كلمه اسف ..يعنى تفتحلوا قلبها لانه عاوز يبتدى صفحه جديده عشان كده احبائي احنا محتاجين من نعمه المسيح ان كان فينا خطية ما نحزنش قلب الكنيسه

منخليش الكنيسه تقعد تبكي علينا كثير
نقولها انا اخطيت.. انا راجع ليكى يا كنيستي اصالح ربنا يسوع المسيح واقول له انا اخطيت.. اقول له انا غير مستحق.. اقولة سامحني اكثر كلمه تفتح ابواب السماء.. كلمه اخطيت.. لكن الانسان المتكبر والانسان المغرور الانسان اللي عايش في شكلية والإنسان الجاحد لا احبائي.. عشان كده اكثر حاجه تحزن الكنيسه لما تلاقي ولادها منصرفين عن ربنا يسوع المسيح
طول النهار بسطت يدي لشعب معاند مقاوم
انا كإنسان بشر واخذ من روح الكنيسه لكن مش انا الكنيسه انا بمثل الكنيسه...تقولى اكثر حاجه تحزنك يا ابونا اية؟؟اكتر حاجة توجع قلبك؟؟ اقول لك اكثر حاجه توجع قلبي خالص واحس ان انا متضايق جدا جدا لو عرفت ان في انسان مات مش تايب ...اكبر حزن يجيلى... مش عشان واحد مات لا... ده موضوع بسيط قوي..طب واحد جالة كانسر ؟ اقولك ازعل شويه بس يعني ربنا يقوية يمكن يكون الكانسر ده لخلاص نفسه لكن الشيء الفظيع اللي يجلب الحزن فعلا ان انسان يموت وهو غير تائب.. يبقى ما عنديش عزاء
لكن انسان قريب من ربنا بيجاهد على طول بيعترف

وبيصلى وقدام ربنا باستمرار فاكر ربنا وباستمرار بيحب ربنا يقولولى مات ..اقولهم مبروك يا بختة هيا الكنيسه شغلتها ايه صناعه قديسين لما نيجي احنا نصنع حاجه والمنتج بتاعنا ده عليه طلب ....بنكون مبسوطين
لانة منتج بيتصدر احنا مصدرين السماء لكن لما يبقى منتج مرفوض يقول لك لا لا اوعى تجيب لي حاجه زي كده
عشان كده احبائي الكنيسه اكثر حاجه تفرحها توبت ولادها.. . اكثر حاجه تفرحها الكنيسة ان ولادها يبقوا ملتفين حوالين عرسها.. وحبيبها ومخلصها ربنا يسوع المسيح عشان كده احنا لازم نعرف ان الكنيسه دى كائن حي مش جماد كون عشرة مع الكنيسه كأمك كون عشرة مع الكنيسة التى تدفعك للخلاص ..
الكنيسة بتعلمنا...تعملنا كهنة يعلمونا ..وبتصللنا فى امراضنا واتعابنا..وتاخد اعترافتنا فى خطايانا وضعفاتنا
وتقول لك خلاص يا ابنى المسيح رفع عنك خطاياك
وتضع عليك الصليب وتقول فولان ان كان أخطأ اليك بشى بعلم بغير علم بجزع قلب .بفعل القول ..انت العارف يارب بضعف البشر..يعنى بتشفع فيك...باركوا قدسوا حلوا

ونرشم عليك علامة الصليب وننفخ فيك نفخة الروح القدس..غفرت خطاياك.....مبروك عليك يا بختك...
يبقى الكنيسة بتقدملك الغفران...وبعد كدة تقدملك المناولة..تفتح قدامك الستر بتاع الهيكل..تشوف السماء المفتوحة...انا وانت المطروضين من السماء الكنيسة بترجعنا ليها تانى. عشان كدة يقولك الكنيسة هى الفردوس المستعاد...وتدخلك جوة حضن ربنا يسوع المسيح
وتقولك تعالى اتناول خد من شجرة الحياة خد من الخبر الإلهى ...الذى آكلة نفسة لا تجوع..لانة يعطى عنا خلاصا وغفرانا وحياة أبدية لكل من يتناول منة
الكنيسه مش بتشوفك ضعيف وتفضل تستهتر بيك
ولا تعايرك.. تشوفك ضعيف تفكر تقويك ساقط ازاي تقييمك ثابت ازاي تنميك هو ده دور الكنيسه يا احبائي عمل الكنيسه ان البعيد يقترب وكل قريب يثبت وكل ثابت ينمو...إذا لا حدود لعمل الكنيسة..فى حياتنا احبائى
٢/// . الشكلية الروتينيه الفريسيه
كأنها بتقولك انا فرحانه صحيح انكم جئتم بس جايين مهمومين وحزانا وقلبكم بعيد وفكركم بعيد قاعدين بجسمكم بس لا

شوف انا عامللهم ايه. شوف هما عاملين معايا ايه شوف انا مقدمالهم ايه وهما جايين ازاي
اعبدوا الرب بفرح ادخلوا الى حضرته بترنم عشان كده الكنيسه تلاقيها عاملة تغني في فرق بين ان انت تقرا الانجيل كده قرايا وان انت تتلوة تلاوه بالنغمه
يعني تحس وانت بتقوله متلذذ حته كده عايز تغنيها هو ده فرحنا فلازم تيجي لربنا وانت فرحان وتعبد بقلب ماتبقاش قاعد في الكنيسه ودماغك فيها الف حاجه انت جاي تحط همومك هنا مش جاي تفكر في همومك هنا...انت جاى تحطها على ربنا جاي تقول له يا رب انت رجائي فيك انا ماسك فيك انا ما ليش الا انت.... انت رجائي وانت عزائى وانت فرحي
انت فرحي وبهجتي وبدونك حياتي طعمها مر
انا جايلك انا مركز معاك قوي كل كلمه بتتقال وكل لحن بيتقال... لكن فريسية العبادة شكليت العبادة الشخص اللى يبقى قاعد مش فاهم ولا مركز ولا عايز يفهم كل شويه دماغه رايحه في حته
الكنيسه تبقى وقفالة واكنها بتقوله و هو انت كده جاي عشان؟ هل تكرمني انا هل تعبدني انا ؟؟هل انت جاي عشاني عشان كده احبائي لما تيجي الكنيسه افرح معلمنا داود يقول لك فرحت بالقائلين لى الى بيت الرب

نذهب وقفت ارجولنا في ديار اورشليم
اورشليم المبنيه مثل مدينه متصلة بعضها البعض هناك صعدت القبائل..قبائل الرب شهادة لاسرائيل..فرحه عشان كده وانت جاي من البيت الى الكنيسه صلي المزمور ده.....ولو مش حافظة احفظوا..فرحت بالقائلين لى الى بيت الرب نذهب... . فرحان فرحان جاى الكنيسة اشكرك يا رب..
الموضوع مش موضوع ناس جايه الكنيسه برجلها لا الكنيسه لازم تكون في قلبنا ..شكلية العباده اللي قاعد فى الكنيسه وهو مش حاسس بحاجه ولا رافع قلبة لربنا ولا بيكلم ربنا ولا بيطلب غفران ولا الخلاص ولابيصلى عن الآخرين ..و قاعد يبص على دة وعلى دة وجايب المشغوليات بتاعتة و مش حاسس بحاجه
خلي بالك..خلى بالك.. كل ده ضدك
وضد خلاص نفسك الكنيسه تزعل قوي ..زي الام اللي بتبكي على ابنها الميت الكنيسه بتبكي على ناس كثير فينا عشان كدة يسوع لما يشوف الكنيسه تبكي يعمل اية ؟يتحنن عليها ...تخيل لما المسيح يكلمنا مرة واتنين واحنا نفضل زى ما احنا...
٣///الانقسام الكراهية البغضه عدم المحبه
الكنيسة تبكى لما تلاقي اولادها متخاصمين

مابيكلموش بعض كل واحد بيفكر في نفسه...تقعد مع الناس المتخاصمه تسمع كل واحد يقول على الثاني كلام تقول يا ساتر... ما عادش في القلب اللي واخد محبه من المسيح.. بنحب بعض بطاقات بشريه طب ما احنا طاقتنا بشرية. طب ما احنا كلنا عيوب.. فلوانا حاولت احبك بره المسيح مش هاقدر مش هعرف لاني لو حبيت احبك بره المسيح هحبك بقدراتي وعقلي وانا قدراتي محدوده وعقلى محدود انا عايز احبك في المسيح يسوع الامر مختلف عشان كده احبائي الكنيسه تزعل قوي على اولادها المتخاصمين واللي يتكلموا على بعض واللى يدينوا بعض.... اوعى تشترك في حديث سلبي..لما تسمع حاجة سلبية..عن حد ماتشتركش فيها..مين الذى لة الحق ان يدين... لماذا تدين عبد غيرك هو لمولاة الكنيسه احبائى لما تلاقي أولادها مقسومين وكلهم مش طايقين بعض وكلهم مش محتملين بعض .. الكنيسه تبكي علينا هما دول ولادى..هما دول جسم المسيح
هما دول ان كل واحد فيهم حته من المسيح قاعدين كل اللي قادرين عليه ان هما يدينوا بعض ويغلطوا بعض وكل واحد عايز يثبت ان هو صح والثاني اوحش واحد في الدنيا.. لو حبيت تقول مين اوحش واحد في

الدنيا تقول انا ....ما احنا كل يوم بنصلي نقول الخطاة اللذين اولهم انا ... .. انا اول الخطاه اذا كان اخويا عنده ضعف انا اضعف منه
عارفين القصه في الكتاب المقدس بتاعه يهوذا وثامار يهوذا عند اولاد فأبنة الكبير اتجوز ومات وما جابش نسل فكانت النساء في العهد القديم بيبقى عندهم شهوه النسل عشان عندها امل ان المسيا هيجي منها
فزوجه الولد اللي مات ده عرضت نفسها...
المفروض ان اخوة يتجوزها ويقيم منها نسل..باسم اخوة... فالولد الاول .ما رضاش والولد الثاني ما رضاش كان عندهم عيل صغير لسه.. قالولها خلاص استني لما الولد الصغير ده يكبر..قالت لهم هو انا هضمن لما الولد ده يكبر يكون عندي القدره على الانجاب.... ثانيا مين قال ان الولد ده لما يكبر ممكن يعمل زي الاثنين اخوات الثانيين ..جتلها فكره مش قوي يعني.. .. لبست لبس النساء الزانيات وعرفت ان يهوذا الاب ماشي رايح مشوار
فيهوذا زانى معاها هي عايزه تزنى ليه؟ هى عايزه تجيب نسل بعد ما نزنى معها...طلبت منة...تذكار.. العصايه بتاعتك والعباية.. فأخذت العبايه والعصايه
وبعد فتره قالوا ليهوذا ان مرات ابنك اللي مات حامل

قال لهم الزانية تحرق وترجم بالنار ...راحت بعثت له العصايه والعبايه قالت له هو ده اللي غلط معي عشان عاوزه اقيم نسل.. عشان عيالك ما ردوش
عمل اية؟قال هي ابر مني ..انا وحش انا زنيت عشان عايز ازنى لكن هي زنت عشان تجيب ولاد.. ممكن يا عزيزي تشوف واحد بيعمل غلط بس انت ما تعرفش هو بيعمله لية!! وانت لازم تقول ان انا اوحش منه يمكن هو بيعمل الحاجه دي انا بعمل الاوحش منها بس في الخفاء..هو ابر مني ...عشان كده احبائي خطيه الانقسام الكراهيه لما الكنيسه تبقى متقسمه لما تبقى المجموعه دي والشله دي مايحبوش يكلموا الشله دي والمجموعات دول مش طايقين دول والعيله دي ما بتحبش العيله دي والاخ ده ما يحبش الاخ ده...
يالة حزن الكنيسه ..الكراهيه والانقسام اكننا بالضبط بنقطع جسم المسيح اكننا بنقوله انا رافضه الجسد انا عايزه ابقى ايد لوحدي...اقول لك ازاي ما ينفعش تكون ايد لوحدك لازم اليد تبقى متصلة بالذهن ومتصلة بالعين والعضلات ..لازم اليد تبقى في وحده مع الجسد
اليد فائدتها ايه خارج الجسد احبائي؟؟ عشان كده احبائي احنا لازم نشوف النقط دي و نصلحها
عشان لازم الكنيسه تبقى فرحانه بينا ولازم المسيح

يبقى سعيد بثمر تعبه لان من تعب يدية يرى ويشبع لازم المسيح احبائي يبقى مسرور بعمل الخلاص بتاعه
الذى صنعة من اجلنا..يبقى كلنا ملفوفين حوالين صليبة يبقى كلنا بنمجد اسمه القدوس..يبقى كلنا بنفتخر بيه كلنا فرحانين بعملوا معانا.. عشان كده احبائى الكنيسه دي كائن حي بيشعر ويفرح و بيتالم و بيحزن علينا ان احنا احبائي نكن اداه لمجد الكنيسه
ولفرح المسيح ولتهليل القديسين لان بلاشك القديسين كمان بيكونوا متالمين لما يشوفوا الكنيسه في ضعف ومن اكثر اللي بيتألموا على أن الكنيسه في ضعف امنا الست العذراء...ياما ناس تشوف الست العذراء بتبكي تبكي لان اولادها منصرفين عن المسيح قالت في بلد في اوروبا رسالة توصلها لمجموعه اطفال صغار..قالت لهم ان الوقت قريب.. روح قولوا للشعب ان الوقت قريب وانتم تلهون والوقت قريب.. احذر من الثلاث حاجات دول ...عدم التوبه ... احذر من الانقسام وشكلية العبادة احذر من الكراهيه... ربنا يدينا احبائى ان نكون سبب فرح للكنيسه ومسرة لربنا يسوع المسيح يشوف فينا ثمر خلاصه ثمر تعبوا ثمر دمة..ويكمل ناقصنا ويسند كل ضعف فينا بنعمته ولالهنا المجد الى الابد امين