العظات
الأسرة والإستعداد للقداس
الأسرة والقداس
الأسرة قديما كانت تشترك معاً فى تقديم الذبيحة منذ أبونا آدم وأبونا نوح وأبونا إبراهيم وإسحق ويعقوب لذلك الكنيسة تجعل من العريس كاهناً فيرتدى البرنس فى صلاة الغكليل المقدس لأن البيت الذى يتأسس هو كنيسة ولابد له من كاهن لذلك يطلق عليه رب الاسرة
ماهو دور لأسرة الروحى بالنسبة للجسدى والمعنوى
البنون ميراث من الرب هو أولاده الكنيسة تعتبر نفسها أنها الام الحقيقيه لهؤلاء الأولاد وتتركهم لدينا كوديعه وتأتمنا على تربيتهم وتنشأتهم تنشأة روحيه وتستودعهم لدينا
أحبائى قد نظن أنه يكفينا ان ننفق على أولادنا وهناك أمر يحتاج إلى جدل (ما رأيكم لو قللنا من دخلنا 20% وأعطينا أولادنا نفس النسبة من الوقت ماذا تتوقع كنتيجة وارجو أن نجرب )
كيف نقدس البيت
الصلاة –التوبة –التسبيح –الإعتراف –العبادة –القداس
الصلاة فى البيت صلاة فرديه وصلاة جماعيه تخيلوا معى أن أولادنا فى كثير من الاحيان يخجلون من الصلاة فى البيت لماذا ؟ هل لأن الصلاة سلوك غريب عن البيت
أم خجل ام عدم تشجيع أم نتصيد خطأ لمن يصلى ونتهمه ونسخر منه
لا يوجد أجمل من منظر الصلاة فى البيت بابا ماما إخوتى تجعل البيت يتقدس ويكون أجمل مكان فى المدينه – ليكن لنا ركن للصلاة فى البيت مزين بصور القديسين المحبوبين لدينا
أولادنا فى إنقسام شديد يسمعون وينجذبون للتعاليم الروحيه لأنها تتناسب مع محبيتهم لله وروح الله العامل فيهم ويجدون الأسرة فى تناقض مع ما تسمع او تتظاهر به خارجياً
ولا يخفى عليكم العالم الخارجى والصداقات والعثرات هذا ينشىء فيهم صراعاً شديداً وكلنا نعرف أن الإنسان مأخوذ من الأرض وينجذب لكل ما هو أسفل ويميل إلى الراحه واى عمل إيجابى يحتاج إلى تعب
مساعدتهم على التسبيح تماجيد قديسين أعياد ترانيم أجزاء من التسبحة
التوبة
روح التوبه تحتاج لإكتساب لو غضبت لو كذبت لو قصرت فى وصية احتاج أن اساعد نفسى بأولادى لنكتسب روح التوبه ومحاسبة النفس الامر يحتاج إلى تدريب جلسات هادئه وأساعد إبنى على الصراحة ويتعلم كيف يفحص ذاته ويحاسبها كيف أعلم إبنى كيف يقرأ كتب بسيطة جداً ونتناقش سيرة عقيدة بستان الروح حياة التوبة والنقاوة كتب أبونا بيشوى
توفير الهدوء يسكن خطايا عظيمة
الإعتراف
التشجيع عليه والمتابعه والشرح والمساعده فى الفهم الصحيح وكسر حاجز الخجل ومعرفة قوة السر ويرانا عملياً نمارسة أحيانا أقول كتر خير الأولاد أنهم يمارسون ما لم يروا أسرهم يفعلوه (سؤال ماهى نسبه اللذين يعترفون من الكبار )وكيف نساعد أولادنا على أشياء لا نمارسها ولا أريد أن أقول لا نقتنع بها
التوبه الوضوح معرفه كشف الذات عدم التبرير التركيز
نحضر كتاب ونقرأ ونتناقش ونربطه بالفسحه والهديه والوقت القيم الذى نقضيه معهم
العبادة
نساعدهم فى الشرح والممارسه والحضور والتبكير والتفاعل والإدراك
هل تحرص على حضور رفع بخور عشيه أنت وأسرتك وصدقنى لو إبنى شبع بكنيسته ومسيحه وإنجيله لا تخاف عليه من أى تيار مهما كان سلطانه لا النت ولا الدش ولا الصداقات لأنه شبعان وكما تعلمنا النفس الشبعانه تدوس العسل
القداس
لابد من فهم أجزاء القداس رفع بخور باكر وعشية وقداس الموعوظين وقداس المؤمنين
لابد أن أشترك فى العبادة والصلوات وأتفاعل كنستنا كنيسة شركة (إرحمنا –إنعم لنا بمغفرة خطايانا-إهدنا .....) القراءات والتركيز فيها (كان والد تماف إيرينى يسأل أولاده عن القراءات ويربطها بطلب يطلبه كل واحد)
القداس رحلة توبة وصلاة وإرتفاع للسماء لابد له من إعداد مسبق تحديد اليوم تجهيز النفس الوقت الملابس الوقت الظروف الوعى بالصلاة
ما أجمل أن نربط الأمور الروحية بالترفيه والهدايا والجلوس مع الأسرة
كثيراً ما نتساءل لماذا تأثير الأصدقاء إلى هذا الحد لأن الأسرة لم تستطيع أن تتواصل مع أبنائها ولم تصادقهم أو تحترمهم لذلك لا نتعجب إن قلنا أن تأثير الأصدقاء يصل إلى أكثر منة 72%من سلوكهم
الاُسْرَة وَالمُرَاهِق
لاُسْرَة وَالمُرَاهِق
نِتْكَلِّمْ مَعَ بَعْض عَنْ مَرْحَلِة المُرَاهْقَة وَسِمَاتْهَا وَإِزَّاي نِتْعَامِل مَعَاهَا .. مُعَلِّمْنَا بُولِس الرَّسُول يِقُول ﴿ أَيُّهَا الأَوْلاَدُ أَطِيعُوا وَالِدِيكُمْ فِي كُلِّ شَيْءٍ لأَِنَّ هذَا مَرْضِيٌّ فِي الرَّبِّ . أَيُّهَا الآبَاءُ لاَ تُغِيظُوا أَوْلاَدَكُمْ لِئَلاَّ يَفْشَلُوا ﴾ ( كو 3 : 20 – 21 ) .. مَرْحَلِة المُرَاهْقَة مَرْحَلَة فِيهَا مَشَاكِل كِتِيرَة وَصِدَامَات وَتَغَيُّرَات فِيهَا الإِنْسَان يِتْشَكِل عَلَى مُسْتَوَى نُضْجٌ شَخْصِي .. مَرْحَلِة وِلاَدَة جِدِيدَة .. " مُرَاهِقٌ " لَيْسَتْ مَعْنَى قَبِيح بَلْ مِنْ " رَاهَقٌ " بِمَعْنَى " رَاهَقٌ عَلَى الشِئ أي إِقْتَرَبْ مِنْ الشِئ . إِقْتَرَبْ عَلَى النُضْجٌ " .
أُرِيدْ أنْ أقُول أنَّ الإِنْسَان لَهُ وِلاَدَتَيْنِ وِلاَدَة جَسَدِيَّة وَوِلاَدَة نَفْسِيَّة .. الجَسَدِيَّة مَعَاهَا مَشَاكِل ألَمْ عَنْد الأُم وَصُرَاخ عِنْدَ الطِّفْل .. دِي وِلاَدَة جَسَدِيَّة .. وِلاَدِة النَّفْس هِيَّ المُرَاهْقَة .. الأوِّل خَرَج مِنْ بَطْن مَامْتُه وَالثَّانِي يِطْلَعْ مِنْ سُلْطَان أُسْرِتُه .. زَي مَا وِلاَدِة الجَسَد فِيهَا ألَمْ جَسَدِي عَلَى الأُم وَألَمْ نَفْسِي عَلَى الوَلَد فَبِيُصْرُخ لِذلِك وِلاَدِة النَّفْس فِي المُرَاهْقَة فِيهَا ألَمْ عَلَى الأُم وَألَمْ عَلَى الوَلَد .. يِقُولُوا إِنْ الإِنْسَان يِقْضِي أطْوَل فِتْرَة يَحْيَا كَكَائِنْ غِير مُسْتَقِل وَبِتَعْبِير آخَر يُولَد قَبْل مِيعَادُه .. الطِّفْل يُولَد بَعْد تِسْعَة شُهُور وَيَرْتَبِطْ بِأهْلُه سَنَة .. إِتْنِينْ .. تَلاَتَة مِشْ عَارِفْ يِعْمِل أي حَاجَة مِنْ غِيرْهُمْ .. إِذَا كَانْ رَبِّنَا شَايِفْ إِنْ مِشْ مِنْ الصَوَاب إِنْ الأُم تِفْضَل حَامِل سَنَة أوْ خَمْسَة عَلَى مَا تِجِيبْ وَلَد يِعْرَف يِمْشِي وَيِتْصَرَّفْ لكِنْ أوِّل مَا يِقْدَر يُخْرُج يُخْرُج لكِنْ تَحْت رِعَايَتْهَا .. تِقْدَر تِأكِّلُه وَتِنَظَفُه وَتِدَافِعْ عَنُّه وَهُوَ مِسَلِّمْ نَفْسُه تَمَاماً وَلاَ يَعْرِف أي شِئ إِلاَّ هِيَّ لِذلِك وُلِد قَبْل مِيعَادُه .. الكَائِنَات الأُخْرَى بَعْد فِتْرَة صَغِيرَة مِنْ الوِلاَدَة يُخْرُج وَحْدُه لاَ يَعْرِف أُم أوْ أب .. الِّلِي عَنْدُه سَمَك مِنْ لَحْظِة خُرُوج السَمَكَة تِعِيش حَيَاة مُسْتَقِلَّة ..لكِنْ الإِنْسَان إِنْ لَمْ يَجِد مَنْ يُلَبِّي إِحْتِيَاجَاتُه يِمُوت لِذلِك نِقُول إِنْ فِتْرِة المُرَاهَقَة هِيَّ فِتْرِة وِلاَدَة جِدِيدَة .. فِتْرِة الإِمْتِلاَء .. فِتْرِة خُرُوج مِنْ مَجَال سَيْطَرِة الأُسْرَة فِيهَا يِقُول أنَا أعْمِل الِّلِي أنَا عَاوْزُه مِشْ الِّلِي إِنْتُمْ عَاوْزِينُه .. مِنْ هِنَا هِيَّ فِتْرَة مَلِيئَة بِالمَشَاكِل وَالعِنَاد وَالكُلَّ يِشْتِكِي .. الوَلَد وَالبِنْت بِتِتْغَيَّر .. مِشْ هُوَ دَه إِبْنِي .
دَه لَوْ فِضِل زَي مَا هُوَ يُبْقَى مِشْ طَبِيعِي وَعَاوِز عِلاَج .. هُوَ كَائِنْ مُسْتَقِل لُه رَغْبَة شَخْصِيَّة مِنْ هِنَا يِبْدَأ يِقْطَعْ الحَبْل السُّرِّي بِالتَّدْرِيج .. مَرْحَلِة وِلاَدَة وَنُمُو .. فَالمُرَاهِقٌ نَفْسُه يِكُون فِي صِرَاع مَا بَيْنَ الإِسْتِقْلاَل وَمَا بَيْنَ الإِرْتِبَاط ..مَا بَيْنَ إِنُّه مِحْتَاجٌ لأُِسْرِتُه فِي بَعْض الأُمور وَمَا بَيْنَ الإِسْتِقْلاَل بِشَخْصِيِتُه الجِدِيدَة .. هُوَ عَاوِز يِحْتِفِظْ بِأُمور كِتِيرَة مِنْ الطُفُولَه وَأُمور كِتِيرَة مِنْ الرُّجُولَة ..البِنْت شَايْفَه نَفْسَهَا عَرُوسَة تِشْبِه مَامِتْهَا وَفِي دَاخِلْهَا طِفْلَة .. عَاوْزَه يِعَامْلُوهَا كِبِيرَة وَبَعْد فِتْرَة عَاوْزَه تِلْعَبْ .. إِنْتِ كِبِيرَة وَلاَّ صُغَيَّرَة ؟ جِسْمَهَا كِبِير وَنَفْسِيِتْهَا صُغَيَّرَة .. فَهُمْ فِي صِرَاع مَا بَيْنَ المَرْحَلَة الجِدِيدَة وَالمَرْحَلَة القَدِيمَة لِذلِك يِشْتِكِي مَحَدِش فَاهِمْنِي وَلاَ حَاسِس بِيَّ بَابَا وَمَامَا وَالكِنِيسَة .
الحَقِيقَة هُوَ نَفْسُه مِشْ فَاهِمْ نَفْسُه .. إِنْتَ عَاوِز نِعَامْلَك كَكِبِير ؟ خَلاَص نِعَامْلَك كَكِبِير .. أُقْعُد إِقْرَا إِنْجِيل وَاحْضَر قُدَّاس وَاحْفَظ ألْحَان وَكُنْ مُلْتَزِم .. يِقُول .. لأ .. عَاوِز ألْعَبْ .. خَلاَص إِطْلَعْ مَعَ فَصْل مَدَارِس أحَد مَعَ الأطْفَال .. يِقُول أنَا كِبِير شُوفُوا لِي حَلْ .. هُوَ مِشْ قَادِر يُسْلُك كَكِبِير أوْ كَطِفْل وَيُخْرُج بَرَّه النَّاس تِعَامْلُه كَكِبِير وَفِي البِيتْ كَطِفْل فَيِمِيل لِلخَارِج لأِنَّهُمْ بِيِحْتِرِمُوه كَكِبِير لكِنْ فِي البِيتْ صُغَيَّر لأِنُّه كَانْ عَلَى إِيدِيهُمْ لِسَّه فِي نَظَرْهُمْ صُغَيَّر وَمِنْ هِنَا الصِرَاع .. مِشْ فَاهِمْ نَفْسُه مُتَرَدِّد .. مِحْتَاج حَدْ يِقُول لُه .. لأ .. وَيِفْرَح وَفِي وَقْت تَانِي يِقُول أنَا عَاوِز أخُد حُرِيِتِي .. يِشْتِكِي إِذَا إِتْعَامِل كَطِفْل وَكَكْبِير .. مُتَقَلِبْ فِي المَزَاج فَيَبْدَأ يِكُون فِي عَدَم طَاعَة وَيِقُول ألْفَاظ جَارْحَة وَخَارْجَة وَيِرُد وَيُطْلُبْ إِنُّه يِكُون مُسْتَقِل وَفِي مُشْكِلَة كِبِيرَة جِدّاً .. هُنَاك ثَوْرَة فِي دَاخِل الجِسْم مِنْ النَشَاط الهُرْمُونِي الجِدِيد الَّذِي يُفَجِّر نُوع مِنْ أنْوَاع الغَرَائِز الِّلِي هُوَ أوِّل مَرَّة يِكُون شَاعِر بِيهَا فَابْتَدَى يِكُون لُه مِيل رَهِيبْ لِلجِنْس الآخَر وَمِيُول وَغَرَائِز وَبَدَأ يِحِس بِالشَّهْوَة فِي حِينْ إِنُّه حَاسِس إِنُّه طِفْل وَالنَّاس بِتْعَامْلُه كَأنُّه طِفْل وَبِتْسَلِّمْ عَلِيه وَبِتُحْضُنُه وَيُقَبِلُوه مَعَ إِنْ أفْكَارُه بَدَإِتْ تِتْغَيَّر .. بِالإِضَافَة إِلَى مَا يَرَاه فِي التِلِيفِزْيُون وَخِبْرِه أصْدِقَاء السُوء فِي المَدْرَسَة وَالشَّارِع وَالمُجْتَمَع .. صِرَاع رَهِيبْ بَيْنَ غَرَائِزُه وَمَا يَجِبْ أنْ يَكُون عَلِيه وَبَيْنَ القُّوَة الجِدِيدَة فَيَكُون عَنْدُه نُوْع مِنْ عَدَم الإِرْتِيَاح وَنُوْع مِنْ تَأنِيبْ الضَمِير وَيَسْتَثْقِل لِلأُمور الرُّوحِيَّة .. كَام وَاحْدَة فِيكُمْ تِقُول إِنْ الوَلَد مَا كَنْش يِفَوِت قُدَّاس وَيصَحِّينَا لِلكِنِيسَة لكِنْ دِلْوَقْتِي نِصَحِيه بِالعَافْيَة وَيعَطَلْنَا وَفِي الأخِر مَايرُوحْش .. صِرَاع .. صِرَاع بَيْنَ طَبِيعِة جَسَدُه وَغَرَائِزُه وَسِنُّه وَتَغَيُّرَات نَفْسِيَّة .. هِيَّ دِي مُشْكِلِة المُرَاهِقٌ.
كَيْفَ تَتَعَامَل مَعَاه الأُسْرَة ؟ لاَزِم الأُسْرَة تِتْعَامِل مَعَاه بِلُون مِنْ ألْوَان التَّوْجِيه وَالإِرْشَاد وَالنُصْحٌ .. فِي الخَارِج الوَلَد أوْ البِنْت فِي سِنْ 12 – 13 – 14 سَنَة هِنَاك الشُغْل مُتَاحٌ يِشْتَغَل 4 – 5 سَاعَات فِي اليُوْم يِعْمِل مَبْلَغ وَيَاخُد سَكَنْ مُسْتَقِل وَيِشُوف زِمِيل وَلاَّ إِتْنِينْ يِأجَرُوا شَقَة وَيِعِيشُوا حَيَاتْهُمْ مِنْ أكْل وَشُرْب وَتَعْلِيمْ وَعِلاَقْتُه إِنْتَهِتْ بِأُسْرِتُه .. وَلَوْ هُمَّ أُسْرَة مُرْتَبِطَة بِبَعْضَهَا يِتِصْلُوا بِبَعْض .. وَالأُسْرَة تِقُول مَعَنْدِنَاش وَلَدٌ يِعِيش فِي البِيتْ أكْتَر مِنْ كِدَه .. قَلِيل جِدّاً لَمَّا تِلاَقِي أُسْرَة زَي طَبْعِنَا المَصْرِي يِقُولُوا دَه إِبْنِنَا فِي الكُلِيَّة .. وَدَه إِتْخَرَّج .. وَدَه مِتْجَوِز .. الكَلاَم دَه غِير مَوْجُود بِالمَرَّة .. وَهُمَّ هِنَاك مِعَلِّمِينْ الطِّفْل إِنْ لَوْ بَابَا أوْ مَامَا شَخَطْ فِيك إِتِصِل بِالرَقَمْ الفُلاَنِي وَإِحْنَا نَاخْدَك وَنِعْمِل لُهُمْ مَحْضَر . طَبْعاً الطَّرِيقَة دِي لاَ تِبْنِي وَلاَ تِرَبِّي .. لاَبُد لِلأهْل أنْ يَشْعُرُوا إِنْ الأوْلاَد مَسْئُولِينْ مِنْهُمْ وَإِنْ كَانْ هُوَ بِيُعْلِنْ تَمَرُّدُه لكِنْ أنَا مِنْ أمَانْتِي أرْشِدُه .. رَبِّنَا لَمَّا أعْطَانَا الأوْلاَد أعْطَاهُمْ كَأمَانَة كَوَدِيعَة .. ﴿ البَنُون مِيرَاثٌ مِنْ الرَّبَّ وَثَمَرَةُ البَطْن عَطِيَّةٌ مِنْهُ ﴾ ( مز 126 مِنْ مَزَامِير الغُرُوب ) .. مِينْ يِعْرَف يِجِيبْ طِفْل ؟
الإِنْسَان الِّلِي عَنْدُه طِفْل دَه عَطِيَّة مِنْ رَبِّنَا .. الكِنِيسَة تُؤمِنْ إِنْ الأوْلاَد الِّلِي بِيِتْوِلْدُوا هُمَّ أوْلاَد الكِنِيسَة وَإِحْنَا مُؤتَمَنِينْ عَلَى تَرْبِيتْهُمْ .. يَعْنِي مِنْ يُوْم مَعْمُودِيتْهُمْ وَهُمَّ أوْلاَد الكِنِيسَة وَالكِنِيسَة تِدِّيهُمْ لِينَا وَتِقُول رَبُّوهُمْ عَنْدُكُمْ .. وَاحِد مِنْ القِدِّيسِينْ يِقُول ﴿ يُمْكِنْ أنْ تَتَعَامَل الأُم مَعَ إِبْنَهَا كَمُرْضِعَة كَمَا كَانَتْ يُوكَابِد تُرْضِعْ مُوسَى وَتُرْجِعُه إِلَى قَصْر فِرْعُون ﴾ .. لَوْ وَاحِد عَمَّد طِفْل تِتْعِمِل لُه زَفَّة فِي الكِنِيسَة لأِنَّهُ مِشْ إِبْنَك لِوَحْدَك لكِنْ إِبْنِنَا كُلِّنَا وَيُوْم مَا يِتْجَوِز الكِنِيسَة هِيَّ الِّلِي تِجَوِزُه . حَتَّى لِغَايِة يُوْم مَا يِرُوح السَّمَا الكِنِيسَة أيْضاً هِيَّ الِّلِي تِوَدِّيه السَّمَا .
لاَبُد أنْ لاَ نَتَخَلَّى عَنْ مَسْئُولِيِتْنَا كَأبَاء .. عَالِي الكَاهِن لَمَّا وِلاَدُه أخْطَأُوا وَأبُوهُمْ أهْمَل الأمر دَه زَعَّل رَبِّنَا جِدّاً .. مِنْ ضِمْن الحَاجَات الأسَاسِيَّة فِي هذِهِ الفِتْرَة إِنْ إِحْنَا بِنْرَكِّز عَلَى حَاجَات وَنِسِيبْ حَاجَات .يَعْنِي مَثَلاً حِوَارْنَا كُلُّه المُذَاكْرَة .. عَدَم التَّأخِير .. مَاترُوحْش لِلمَكَان الفُلاَنِي .. مَاتِمْشِيش مَعَ فُلاَن .. بِنْرَكِّز عَلَى بَعْض السَلْبِيَات وَنِتْعِبْ نَفْسِينَا فِيهَا دُونَ أنْ نِرَكِّز عَلَى إِيجَابِيَات مِنْ هِنَا تَنْشَأ صِدَامَات وَصِرَاعَات .. البِيتْ مِرَكِّز عَلَى بَعْض الأُمور لِدَرَجِة نِسْمَعْ تَعْبِير مِنْ الوِلاَد يِقُولُوا " النَّاس دِي بِتُخْنُقْنِي " .. إِنْتَ بِتِتْعَامَل مَعَاه بِأُسْلُوب إِنْ كُلَّ حَاجَة فِيه غَلَطْ .. زَمَان وَهُوَ صُغَيَّر كَانْ مَمْدُوحٌ مِنْ الجَمِيعْ وَلكِنْ لَمَّا كِبِر مَحَدِش مِهْتَمْ بِيه .. أحْيَاناً نُوَبِخ أمَام الغِير وَبِذلِك يَنْشَأ دَاخِلُه لُون مِنْ ألْوَان البُغْضَة وَالكُرْه .
فِي دَاخِل المُرَاهِقٌ يِقُول أنَا إِكْتَشَفْت إِنْ الجَمَاعَة دُول عَاوْزِينْ وَاد غِيرِي حِلْو .. مُطِيعْ .. بِيْجِيبْ دَرَجَات حِلْوَة وَالصِفَات دِي كُلَّهَا مِشْ مَوْجُودَةٌ فِيَّ .. وَاضِح إِنُّهُمْ نَدْمَانِينْ إِنُّهُمْ جَابُونِي وَبِصَرَاحَة أنَا نَدْمَان إِنُّهُمْ أهْلِي .. إِحْذَر تِشْتِكِي مُرَاهِقٌ أوْ مُرَاهْقَة أمَام الآخَرِينْ .. إِحْذَر تِشْتِكِي مُرَاهِقٌ أوْ مُرَاهْقَة قُدَّام أبُونَا .. أبُونَا دَه أب إِعْتِرَافُه .. أبُونَا هُوَ الخِيطْ الِّلِي بِيُرْبُطُه بِرَبِّنَا .. الأُم تِكُون فَرْحَانَة إِنَّهَا فَضِّتْ الشُحْنَة الِّلِي جُوَاهَا وَحَطِّتْهَا عَلَى أبُونَا .. مُمْكِنْ كِدَه الوَلَد يِوْصَل لِدَرَجَة يِقُول مِشْ مُهِمْ حَتَّى أبُونَا إِذَا كُنْتُمْ حَاتذِلُّونِي بِيه .. المَرْحَلَة دِي حَسَّاسَة قَوِي .. أحْيَاناً نِسْمَع الطِّفْل دَه مَوْلُود مِحْتَاج حَضَّانَة .. المُرَاهِقٌ وَالمُرَاهْقَة مِحْتَاجِينْ حَضَّانَة .. حَضَّانَة لاَ تُقَدِّم أُكْسُجِين وَالأكْل المُنَاسِبْ وَدَرَجِة الحَرَارَة المُنَاسْبَة بِتَاعِتْ الأطْفَال الصُّغَار بِتْقَدِّم دَرَجِة حَرَارَة مِنْ العَاطِفَة وَمِنْ الأُكْسُجِين الِّلِي هُوَ التَّشْجِيعْ وَمِنْ الجَو المُلاَئِمْ لِحِفْظ هذَا المُرَاهِقٌ .. كِبِير وَمِحْتَاجٌ حَضَّانَة .
فِي مَرَّة مِنْ المَرَّات كَانْ فِي مُسْتَشْفَى وِلاَدَة الغُرْفَة كُلَّهَا صُرَاخٌ وَالطِّفْل الهَادِي لَمَّا يِسْمَعْ طِفْل جَنْبُه بِيُصْرُخ يُصْرُخ زَيُّه .. إِبْتَدُوا يِشَغَلُوا مُوسِيقَى عَشَانْ يِهْدَى الجَو .. بَدَأُوا يِعْمِلُوا دِرَاسَة عَنْ المَوْضُوع دَه لِغَايِة لَمَّا وَاحِد إِتْوَصَّل لِفِكْرَة جَاب تَسْجِيل صَوْتِي لِصُوت نَبَضَات قَلْب الأُم بِنَفْس إِلـ sound system وَحَطُّوه فِي غُرْفِة الأطْفَال .. الأطْفَال سِمْعُوا نَفْس الصُوْت الِّلِي كَانُوا بِيِسْمَعُوه دَاخِل بَطْن أُمُّهُمْ إِبْتَدُوا يِهْدُوا .. المُرَاهِقٌ مِحْتَاجٌ يِسْمَعْ نَبَضَات قَلْب أُمُّه وَنَبَضَات قَلْب أبُوه وَلكِنْ عَلَى مُسْتَوَى العَاطِفَة .. لِذلِك إِنْ كَانِتْ مَرْحَلِة المُرَاهْقَة مَلِيئَة بِالمُتَغَيِرَات وَالنِزَاع وَالتَمَرُّد وَالمَشَاكِل وَالعِصْيَان وَأصْدِقَاء السُوء .. هُنَاك إِحْصَائِيَّة تَقُول إِنْ المُرَاهِقٌ تَأثِير أُمُّه عَلِيه يَصِل إِلَى 27 % وَتَأثِير أبُوه عَلِيه يَصِل 13 % وَتَأثِير الأصْدِقَاء يَصِل إِلَى 60 % .. مُهِمْ جِدّاً أعْرَف إِبْنِي أصْدِقَائُه مِينْ .. مُهِمْ جِدّاً يِكُون لِيَّ تَوَدُّد مَعَ إِبْنِي لكِنْ مِنْ خِلاَل صَدَاقَة وَلَيْسَ عُنْف .. لِذلِك نِلاَحِظْ الوِلاَد عَنْدُهُمْ رَفْض لِلنَّصِيحَة .. عَنْدُه تَمَرُّد عَلَى المَبَادِئ .. تِقُولُّه مَعَنْدِناش حد يتْأخَر بَرَّه البِيتْ .. يِقُول دَه كَانْ زَمَان .. نِلاَحِظْ إِنْ لَدَيْهِ كُرْه لِلمَبَادِئ .. لَدَيْهِ الرَّغْبَة لِتَكْوِينْ شَخْصِيَّة مُخْتَلِفَة .
1/ الإِهْتِمَام بِالبُعْد الرُّوحِي :
المُرَاهِقٌ مِحْتَاجٌ إِهْتِمَام رُوحَانِي .. مِنْ المُؤسِفْ إِنِّنَا ألْقِينَا بِالمَسْئُولِيَّة بِالكَامِل عَلَى الكِنِيسَة فِي الجَانِبْ الرُّوحِي وَكَأنَّهُ لَيْسَ إِخْتِصَاصْنَا .. إِزَّاي إِنْ أنَا لاَ أهْتَمْ إِنْ بِيتِي يِكُون بِيتْ صَلاَة وَنُقَفْ نِصَلِّى مَعَ بَعْض ؟!! نِقُول هُوَ مَرَضَاش !! .. حَتَّى لَوْ هُوَ مَرَضَاش قِفْ وَصَلِّي .. وَقْفِتَك لِلصَّلاَة سَتُقَدِّس البِيتْ وَسَتُغَيِّر البِيتْ وَتَحْمِي البِيتْ مِنْ التَّجَارُب .. رَبِّنَا فِي سَدُوم وَعَمُورَة حَبْ يِلاَقِي (10) وَلكِنْ مَالَقَاش .. رَبِّنَا قَالْ لأِرْمِيَا النَّبِي ﴿ طُوفُوا فِي شَوَارِعِ أُورُشَلِيمَ وَانْظُرُوا وَاعْرِفُوا وَفَتِّشُوا فِي سَاحَاتِهَا هَلْ تَجِدُونَ إِنْسَاناً أَوْ يُوْجَدُ عَامِلٌ بِالْعَدْلِ طَالِبُ الْحَقِّ فَأَصْفَحَ عَنْهَا ﴾ ( أر 5 : 1 ) .. يَعْنِي لَوْ لَقِينَا وَاحِدٌ قَبْل السَّبْي كَانْ مُمْكِنْ إِنْتَ يَارَبَّ تِرْجَعْ ؟ قَالْ آه .. رَبِّنَا مُمْكِنْ جِدّاً بِسَبَبْ بَار يِرْفَعْ غَضَبْ .. وَإِنْتَ فِي بِيتَك بِتْصَلِّي بِتِرْفَعْ غَضَبْ .. وَقْفِتَك وَإِنْتَ بِتْصَلِّي سَتُقَدِّسُه .. سَتُوقِظْ قَلْبُه .. سَتُبَارِكُه .
المُرَاهِقٌ لَمَّا مَايلاَقِيش الحَاجَات دِي فِي بِيتُه حَتَّى لَوْ كَلِّمْنَاه عَلَى الرُّوحِيَات مَالْهَاش عَنْدُه مَرْجِعِيَّة .. تِكَلِّمُه عَنْ الرُّوحِيَات يِقُولَّك دِي أُمور شَكْلِيَّة .. لِيه ؟ لأِنُّه مَالَقَهَاش فِي بِيتُه .. لِذلِك لاَزِم تِهْتَمْ بِالبُعْد الرُّوحِي .. مِينْ فِينَا مُمْكِنْ يِعَلِّمْ إِبْنُه حَاجَة وَلَوْ بَسِيطَة مِنْ الرُّوحِيَات ؟ نِهْتَمْ بِالأكْل وَالشُرْب وَاللِبْس وَهُمَّ أطْفَال نِجِيبْ لِعَبْ لَمَّا بَقَى مُرَاهِقٌ مَفَكَرْتِشْ أجِيبْ لإِبْنِي كِتَاب يِقْرَاه يُخُص مَرْحَلْتُه .. لَمَّا تِلاَقِي إِبْنَك بِيمُر بِمُنْعَطَفْ خَطِير زَي كِدَه جِسْمُه بِيِتْغَيَّر وَغَرَايْزُه بِتِتْغَيَّر وَفِكْرُه بِيِتْغَيَّر وَصَدَقَاتُه .. مَجَبْش لُه عِظَة يِسْمَعْهَا .. إِنْتَ مُمْكِنْ تِقْرَا مَخْصُوص عَشَان تِعَلِّمْ إِبْنَك .. أحْيَاناً طِفْل عُمْرُه 3 – 4 سِنِينْ نِسْمَعْ عَنُّه دَخَلْ مَدْرَسَة ألْمَانِي وَمَامْتُه أخَدِت كُورْس ألْمَانِي عَشَانْ تِعْرَف تِعَلِّمْ الوَلَد ألْمَانِي .. يَعْنِي الكِبِير عَنْدُه إِسْتِعْدَاد يَكْتَسِبْ لُغَة جِدِيدَة عَشَان يِعَلِّمْ طِفْل .. مَعَنْدِنَاش إِسْتِعْدَاد نِقْرَا كِتَاب صُغَيَّر عَشَانْ نِوَاجِه بِيه مَرْحَلَة حَرِجَة جِدّاً فِي مَرْحَلِة وِلاَدْنَا .
البُعْد الرُّوحِي مُهِمْ جِدّاً .. مُهِمْ جِدّاً يِشُوفْنِي أنَا كَكِبِير بَعْتِرِف عَشَانْ هُوَ يِعْتِرِف .. مُهِمْ يِشُوفْنِي أنَا بَحْضَر القُدَّاس بِاشْتِيَاق وَبِرُوحٌ صَلاَة عَشَانْ هُوَ يِسْتِلِمْ الحَيَاة الرُّوحِيَّة وَلَيْسَتْ نَظَرِيَات .. التَّسْلِيمْ مِنْ جِيل لِجِيل .. تَابِعْ إِبْنَك رُوحِياً .. شَجَّعُه عَشَانْ دَاخِل عَلَى مُجْتَمَعْ شَرِس .. النَّهَارْدَة كُنَّا الأوِّل بِنُوَاجِه التِلِيفِزْيُون فِيه قَنَاتِينْ .. النَّهَارْدَة قَنَوَات لاَ تُعَد .. أنَا فَاكِر زَمَان كَانْ فِي بِرْنَامِج إِسْمُه " اليُوْم المَفْتُوح " يُوْم الحَدٌ عَلَى القَنَاة الأُولَى .. اليُوْم المَفْتُوح دَه كَانْ بِالنِّسْبَة لِلكِنِيسَة كَارِثَة .. مَالَقُوش غِير يُوْم الحَدٌ الصُبْح عَشَانْ يِعْمِلُوا فِيه اليُوْم المَفْتُوح ؟!! النَّاس بِتْكَسِّل عَنْ الكِنِيسَة وَأحْيَاناً كَانُوا الأبَّهَات بِيْنَبِهُوا صَرَاحَةً مَاتفَضَلْش اليُوْم المَفْتُوح عَلَى القُدَّاس .. النَّهَارْدَة مُمْكِنْ تِسْمَعْ وَاحِد يِقُولَّك أنَا شُوفْت (6) أفْلاَم .. القَنَاة تِجِيبْ فِيلْم وَرَا فِيلْم وَنِمْت السَّاعَة (4) الفَجْر .. فِينْ بَابَا وَمَامَا ؟ بَابَا وَمَامَا نَامُوا عَشَانْ يِصْحُوا لِلشُغْل .
إِنْتَ نِمْت وَتَرَكْت وِلاَدَك فِينْ مَسْئُولِيِتَك ؟ يِقُولِّي جَرَّبْت وَإتْخَنِقْنَا .. المَوْضُوع دَه مَا يِتْسِكِتْش عَلِيه .. دِي وَزْنِتَك .. رَبِّنَا قَالْ لِعَالِي الكَاهِن لَمَّا أهْمَل فِي تَرْبِيِّة أوْلاَدُه ﴿ هُوذَا أَنَا فَاعِلٌ أَمْراً فِي إِسْرَائِيلَ كُلُّ مَنْ سَمِعَ بِهِ تَطِنُّ أُذُنَاهُ ﴾ ( 1صم 3 : 11 ) .. عَاوِز يِقُول شَايِفْ وِلاَدَك فِي إِنْحِلاَل وَإِنْتَ سَاكِتْ وَعَامِل لِي كَاهِن ؟!! .. لأ .. مَا يِنْفَعْش .. هُنَاك وَصِيَّة نِحِبْ نِقْرَاهَا لأُِسَر المُعَمَدِينْ ﴿ لاَ تُمَكِنُوهُمْ مِنْ المُضِي إِلَى الأمَاكِنْ غِير المُجْدِيَة ........ ﴾ .. زَمَان لَمَّا نِعَمِد كُنَّا نِجِيبْ الأُم إِشْبِينْ لكِنْ دِلْوَقْتِي الأُم وَالأب وَيِجْحَدُوا الشَّيْطَان .. التَّرْبِيَة مِحْتَاجَة الأُم وَالأب .
2/ الإِشْبَاع العَاطِفِي :
المُرَاهِقٌ وَبِالرَّغْم مِنْ كُلَّ شِئ إِلاَّ إِنُّه مَازَالَ طِفْلاً .. مِحْتَاجٌ جِدّاً لِلعَطْف .. أحْيَاناً نُشْعُر لَمَّا الوَاحِد يِعَبَّر بِكَلِمَات عَاطِفِيَّة لأِوْلاَدُه إِنْ دَه لُون مِنْ ألْوَان العِيب .. أبَداً مِشْ عِيبْ .. يَعْنِي لَوْ أقُول لإِبْنِي إِنْتَ وَحَشْتِنِي مِشْ عِيبْ .. هُوَ مِحْتَاجٌ يِسْمَعْ مِنِّي كِلْمَة حِلْوَة .. مِحْتَاجٌ أقُولُّه كِلْمَة لَطِيفَة .. مِحْتَاجٌ أحْضُنُه وَأضُمُّه لِيَّ .. مَرَّة وَلَد فَقَد أبُوه وَيُوْم مَا كُنْت رَايِح أعَزِّيه ضَمِّتُه فِي صَدْرِي .. الوَلَد قَالِّي أحْلَى حَاجَة إِنَّك ضَمِّتْنِي لِصَدْرَك .. المُرَاهِقٌ مِحْتَاجٌ لِلإِشْبَاع العَاطِفِي .. مِحْتَاجٌ كَلِمَات شُكْر .. مِحْتَاج لِكَلِمَات مَدْحٌ .. مِحْتَاج أتْكَلِّمْ مَعَاه .. أتْحَاوِر مَعَاه .. أسْمَعُه وَيِسْمَعْنِي .. جَمِيل جِدّاً إِنُّه يِشُوف أُسْرِتُه بِتْقَدِّم لُه الحَاجَات الِّلِي مُفْتَقِر إِلِيهَا .. مِحْتَاجِينْ جِدّاً لِلإِشْبَاع العَاطِفِي .
3/ مَا هِيَ حُدُود السُّلْطَة وَمَا هِيَ حُدُود الخُضُوع
السُّلْطَة لَيْسَ مَعْنَاهَا الدِكْتَاتُورِيَّة .. السُّلْطَة لَيْسَ مَعَنَاهَا " أنَا قُلْت .. لأ .. تُبْقَى .. لأ " ..أحْيَاناً الوَلَد يِكُون فَاهِمْ إِنْ الخُضُوع ضَعْف وَأحْيَاناً يِكُون فَاهِمْ الخُضُوع إِلْغَاء لِشَخْصِيِتُه .. أبَداً . أحْيَاناً الفِكْر دَه مُتَرَسِبْ فِينَا شِوَيَّة عَشَانْ خَاطِر تَرْبِيَتْنَا تَوَارَثَتْ أُمور مُعَيَّنَة .. الخُضُوع لَيْسَ ضَعْف .. أحْيَاناً البِنْت أوْ السِتْ بِالذَّات يِكُون عَنْدَهَا مُشْكِلَة فِي مَوْضُوع الخُضُوع دَه .. يُهَيَّأ لِي كِتِير مِنْكُمْ لَمَّا يِسْمَعُوا فِي صَلاَة الإِنْجِيل عَلَى أُمِّنَا سَارَة ﴿ كَمَا كَانَتْ سَارَةُ تُطِيعُ إِبْرَاهِيمَ دَاعِيَةً إِيَّاهُ سَيِّدَهَا ﴾ ( 1بط 3 : 6 ) .. كِتِير مِنْكُمْ عَنْدَهَا إِعْتِرَاض عَلَى هذِهِ العِبَارَة .. وَلَوْ إِتْعَمَل مَجْلِس شَعْب وَاتْقَدِّم طَلَبْ إِحَاطَة لِقَدَاسِة البَابَا لِهذِهِ العِبَارَة دَه لأِنْ مَفْهُومْنَا عَنْ الخُضُوع خَطَأ .. مَفْهُومْنَا عَنْ الخُضُوع إِنُّه ضَعْف .. إِنُّه مَذَلَّة .. الخُضُوع لَيْسَ ضَعْف وَلَيْسَ مَذَلَّة .. الخُضُوع حُبْ .. الخُضُوع قَبُول .
قِيلَ عَنْ رَبَّ المَجْد يَسُوع إِنُّه كَانَ خَاضِعاً لَهُمَا ( لو 2 : 51 ) .. قِيلَ عَنْ رَبِّنَا يَسُوع الْمَسِيح ﴿ أَنْ أَفْعَلَ مَشِيئَتَكَ يَا إِلهِي سُرِرْتُ ﴾ ( مز 40 : 8 ) .. قَبْل آلاَم الصَلْب قَالَ ﴿ لِتَكُنْ لاَ إِرَادَتِي بَلْ إِرَادَتُكَ ﴾ ( لو 22 : 42 ) .. قِيلَ ﴿ مَعَْ كَوْنِهِ ابْناً تَعَلَّمَ الطَّاعَةَ مِمَّا تَأَلَّمَ بِهِ ﴾ ( عب 5 : 8 ) .. وِلاَدْنَا لاَزِم يِفْهَمُوا الخُضُوع لَيْسَ ضَعْف وَلاَ مَذَلَّة وَفِي نَفْس الوَقْت سُلْطِتْنَا لَيْسَتْ دِكْتَاتُورِيَّة ..فِي أب مُتَسَلِّطٌ .. وَفِي أب مُتَسَاهِلٌ .. وَفِي أب مُتَفَاهِمْ .. وَفِي أب مُتَسَيِّبْ .. أحْسَنْ وَاحِد فِيهُمْ " مُتَفَاهِمْ " .. " مُتَسَلِّطٌ " .. يُنْشِئ وَلَدٌ مَهْزُوز .. " مُتَسَاهِلٌ " .. مَثَلاً يِكُون مَانِعْ نِسْهَر بَرَّه لكِنْ مَعَ الإِلْحَاح يِخْضَع لِلأمر .. " مُتَفَاهِمْ " .. يِمْنَعْ بِإِقْنَاع أوْ يَمْنَحٌ بِإِقْنَاع .. " مُتَسَيِّبْ " .. الوَلَد مُمْكِنْ يِبَات بَرَّه وَهُوَ مِشْ حَاسِس .. لَوْ سَألْتُه " إِبْنَك فِي سَنَة كَام ؟ " يِقُولَّك فِي إِعْدَادِي .
المَفْرُوض لاَ أُرَكِّز عَلَى كُلَّ مَا هُوَ سَلْبِي وَتَارِك كُلَّ مَا هُوَ إِيجَابِي .. حَدِيثِي مَعَاه مِشْ فِي نُقَطْ مُعَيَّنَة وَبَسْ .. نِلاَحِظْ إِنْ المُرَاهِقٌ عِنَادِي .. مَرَّة وَاحْدَة مِنْ الأُمَهَات بِتْقُول لأِبْنَهَا ذَاكِر وَهُوَ يِرُدٌ أنَا عَارِف مَصْلَحْتِي .. الوَلَد قَعَد يِتْفَرَج عَلَى التِلِيفِزْيُون طُول النَّهَار وَيَاكُل وَيِشْرَب وَيِنَام .. وَفِي يُوْم مِنْ الأيَّام قَالِتْ لُه " يِعْلَمْ رَبِّنَا مِشْ هَا أقُولَّك ذَاكِر تَانِي أبَداً " .. قَالَّهَا " سِبِينِي بِرَاحْتِي " .. اليُوْم الأوَّل فَات وَهِيَّ مَاسْكَة نَفْسَهَا بِالعَافْيَة وَعَامْلَه نَفْسَهَا مِشْ وَاخْدَة بَالْهَا وَهُوَ مِسْتَنِّي يِسْمَعْ مِنْهَا كِلْمِة " ذَاكِر " .. اليُوْم التَّانِي نَفْس الشِئ .. الوَلَد إِتْكَسَفْ وَقَام يِذَاكِر وَهُوَ قَايِمْ قَالِتْ لُه " أنَا سَيْبَاك ثَلاَثَة أيَّام مِشْ تِقُوم تِذَاكِر !! " .. رَاح رِجِعْ الوَلَد يِتْفَرَّج عَلَى التِلِيفِزْيُون .. الوَلَد مِشْ عَاوِز يِقُوم يِذَاكِر عَلَى طَلَبْهَا هِيَّ .. هُوَ مِشْ عَايِز كِدَه .. ﴿ الطَّرِيقٌ الوُسْطَى خَلَّصَتْ كَثِيرِين ﴾ .. مِحْتَاجِينْ إِعْتِدَال فِي تَرْبِيَتْنَا .
رَبِّنَا يَسُوع الِّلِي إِجْتَاز جَمِيع مَرَاحِل الحَيَاة وَقَدِّسْهَا فَهُوَ إِجْتَازَ المُرَاهْقَة وَقَدِّسْهَا وَقَدَّم لَنَا نَمُوذَج فِي كُلِّ سِنْ كَيْفَ يَحْيَا الإِنْسَان .. رَبِّنَا يَسُوع يِبَارِك حَيَاتْكُمْ وَيِحَكِّمْكُمْ لِلخَلاَص وَيُعَلِّمْنَا كَيْفَ نُرَبِّي أوْلاَدْنَا فِي خُوفُه يِكَمِّل نَقَائِصْنَا يِسْنِد كُلَّ ضَعْف فِينَا بِنِعْمِتُه وَلإِلهْنَا المَجْد الدَّائِمْ إِلَى الأبَد أمِين
مابين القيامة والتناول
احنا دلوقتى فى الاسبوع الثانى من الخماسين المقدسة اللى الكنيسة عايزة ترفع قلوبنا وتمسكنا فى المسيح القائم الحى من الاموات وسؤال كثير بنسأله ونقول ازاى نعيش القيامة ازاى أنا استفيد بالقيامة . القيامة بالنسبة لى أنا كانسان تبقى ازاى ما انا مش عارف أقول لك الكنيسة تعطى لك الخطوات الاسبوع اللى فات الكنيسة ركزت فيه على الايمان بالقيامة ما هو ما ينفعش تقول أنا نفسى استفيد بالقيامة وأنت ايمانك فى القيامة مهزوز عشان كدة الكنيسة تركز فى الاسبوع اللى فات على ظهورات ربنا يسوع المسيح لتلاميذه فى القيامة لغاية لما أيقنوا وصدقوا لغاية ما وصلنا لأكثر تلميذ كان شاكك فى حقيقة القيامة اللى هو توما وقال ربى والهى وسجد اذن تبدأ القيامة فأول مرحلة عشان أعيش القيامة لازم أصدقها لازم لما يقول لك المسيح قام أنت تقول بالحقيقة قام بالحقيقة يعنى فعلاً أيوة أيوة انا مصدق صح أيوة بالحقيقة قام فأول خطوة لازم تكون من داخلك بتقول فعلاً قام طيب عشان القيامة النهاردة تنتقل لى أنا الكنيسة تعطى لك أول خطوة مهمة جداً عشان فعل القيامة ينتقل إليك أيه هى الخطوة الفعلية عشان القيامة تنتقل إليك قال لك التناول ازاى قال لك أه من يأكل جسدى ويشرب دمى له حياة أبدية أنا أقيمه فى اليوم الأخير يعنى التناول يعطى لك الحياة الابدية يعنى التناول بينقلك من الموت للحياة يعنى التناول هو القيامة عشان تفرح بالقيامة أتناول عشان تشعر بالقيامة وفعل القيامة التغيير اللى بيدخل جوة حياتك اتناول من يأكل جسدى ويشرب دمى له حياة ابدية انا أقيمه فى اليوم الأخير قال لك ان من يأكل جسدى ويشرب دمى يثبت فى وانا فيه أنت لما تثبت فى المسيح أنت بتثبت فى مين اللى هو مين المسيح الحى القائم من الاموات اذن فعل القيامة حصل أيه انتقل إليك القيامة فعلياً انتقل إليك بايه بالتناول عشان كدة يا احبائى ده اسمه سر الاسرار من يأكل من هذا الخبز يعيش إلى الابد . اللى هى أيه اللى هى القيامة الأفضل اللى احنا بترجاها هى دى القيامة يعنى أقدر أقول لك ان القيامة هى التناول والتناول هو القيامة أقول لك أيوة لأن الانسان مين بالذنوب والخطايا ميت تعالى كدة أدخل إلى الموت اللى داخلك وشوف كدة هتلاقى الخطايا كثيرة قبر قبر الخطية ونتانته كل ده الخطية طيب أيه اللى يطهر من الخطية ديه أيه اللى يخليك تعرف تتجاوز خطاياك ديه توبتك وتيجى تتناول تلاقى نفسك الحياة دخلت إليك انسان ميت ياخد الحياة . الحياة أقوى من الموت تحييه لما تيجى الدنيا ضلمة عايزين نغلب الضلمة ديه نعمل ايه ماينفعش نقعد نقول يالا امشى يا ضلمة مابتعرفش تقعد تقول يالا امشى يا ضلمة هش يا ضلمة كفاية يا ضلمة لأ نور النور تنور الضلمة تنتهى أيه هو النور هو غلبة الضلمة طيب هو أيه الضلمة مفيش حاجة اسمها ضلمة لكن الضلمة هى عقاب النور اذن احنا بالنسبة لنا يا احبائى عشان نشعر بالتناول فعلاً عشان نشعر بالقيامة فعلاً الكنيسة بتقول لك اتناول لأن هو ده اسمه الجسد الحى يا احبائى احنا لو عرفنا قيمة التناول فى الكنيسة ولو اتناولنا واحنا عندنا ايمان باللى احنا بنتناوله فعل المناولة اللى احنا بناخده احنا حالنا يختلف كثير لان انت بتاخد المسيح داخلك وتتحذ به تخرج برة انت نفسك بقيت مسيح انت امال انت أتحدت بمين غيرك ثبتك اتحدت به وهو لك ثبت فيه وهو فيك بقت حياته حياتك الموت اللى فيك انتقل إليه بس لأنه رئيس الحياة فالموت اللى فيك لم يميته لكن الحياة اللى فيه أحيتك أنت عشان كدة يا احبائى اتناول عشان تقوم عشان تحيا عشان تغلب عشان تنتصر ما أجمل يا احبائى ان أنت تحضر قداس بروح التوبة وتقعد كدة عمال تهيأ نفسك للتناول وعمال تتكلم وتقول يا رب أنا غير مستحق وتلاقى القداس كله هو رحلة توبة احبائى احنا كثير جداً نحاول نقيم نفسنا ان احنا نتناول ولا لا نتناول من غير القداس لأ أصل أنا وحش أنا لم أغير ف يعنى خلينى وقت تانى أكون كويس هو أمتى أنت بقيت كويس أنت هتبقى أمتى كويس هو ازاى واحد يشفى من غير دواء تعالى خد الدواء تعالى لتشفى تعالى لتحيا تعالى عشان تتغير مكسل ليه بقى معقول يا احبائى يبقى المسيح على المذبح والكاهن بيصرخ ويقول خذوا كلوا منه كلكم المسيح يا احبائى لو نظر لكنيسة انهاردة وفيه واحد مابيتناولش يبقى صعبان عليه وكأنه بيقول لك يا ابنى أنت تعبت وأنت جئت لغاية هنا فاضل خطوة ليه أيه اللى منعك تقول له أصل فطرت يقول لك ياه هو ده اللى منعك أيه اللى منعك أصل عندى خطية طيب ما أنا بأقول لك تعالى ما هو طهارة لانفسنا واجسادنا وارواحنا ما تعالى ما هو لأنك خاطى أنت تيجى عشان تتناول هو أنت بار ما هو لأنك خاطى ما احنا بنقول له يا رب أنا غير مستحق ولا مستعد ولا مستوجب صلى كدة صلاة قبل التناول بايمان وبتأنى تعمل فيك فعل قوى جداً جداً صلى صلاة قبل التناول وتقول له أنت يا رب لم تستنكف ان تدخل بيت الابرص أنت يا رب ماقرفتش البرص دول الناس مايحبوش يتعاملوا معاهم ولا من بعيد حتى . فى العهد القديم كان الشخص الابرص عشان يحذر الناس من نفسه لو ماشى فى سكة لازم يبقى ماشى مغطى وجهه من الخزى ولو حس ان فيه حد جاى يقعد يصرخ ويقول انا ابرص ابرص ابرص يعنى خد بالك لا تمر بمعنى شوف قد أيه حقارة الانسان الابرص ده وقد ايه الناس تقرف منه وقد أيه هو منبوذ هى ديه الخطية بس مع كدة يقول لك أنت لم تستنكف ان تدخل بيت الابرص أجمل شعور يخليك تقدر تقول ان أنت تتناول ان أنت تقعد تقول أنا ابرص ابرص ابرص أنا يا رب غير مستحق مرة واحد جاى يعترف فيقول أنا يا أبونا فى الحقيقة أنا مش عارف أقول لك أيه بس أنا حاسس ان أنا كوم زبالة ومكسوف من نفسى فقلت له أجمل احساس يجيلك لما تعترف لما تحس ان أنت حاسس ان انت غير مستحق هو ده الشعور اللى المسيح عايز يشوفه فيك وتقول له أنت يا رب لم تستنكف ان تدخل بيت الابرص أنت لم تمنع الخاطئة من قدميك كان المفروض تقول لهم لا لا امنعوا الست دى ماتدخلش اساساً أيه اللى دخلها دى مش مدعوة وأنا جاى البيت عندك يا سمعان عشان تجيب لى أشكال وألوان ومين دى كمان اللى تيجى تجيب لنا الخزى دى امرأة خاطئة فى المدينة يعنى صيتها معروف بالحاجات الوحشة جاية وعمالة تقبل قدميه وبتغسلها بدموعها وعمالة تسكب طيب ، طيب اشخط فيها وأقول لها لما تبقى ست كويسة لما تتوبى تعالى لأ أنت لم تمنع الخاطئة من تقبيل قدميك آدى عمل المسيح فى حياتنا يا احبائى عمل المسيح فى حياتنا أنه يخلينا نستمتع بقوة غفرانه مين اللى بيمنعك من ان أنت تتمتع بقوة غفران المسيح مفيش حاجة تمنعك إلا أنت تقول لى خطاياى أقول لك خطاياك دى تجيبك للمسيح لا تبعدك عن المسيح خطاياك تجيبك تقول له ارحمنى قدسنى طهرنى اجعلنى مستحق اشفينى دى خطاياك تجيبك لا تبعدك عشان كدة عايز تتمتع بالقيامة تعالى واتناول وقف فى القداس صلى صلى صلى وارفع قلبك واطلب توبة توبة رحمة رحمة طول القداس مفيش غير التوبة والرحمة وانعم لنا بغفران خطايانا يا رب ارحم وكيرياليسون وطول القداس اجعلنا مستحقين أوعى تقول له يا رب أنا غير مستحق اتناول أخذت الجسد الحى الموت اللى فيك تحول لحياة بقيت واحد جديد بقيت عندك استعداد تشهد للمسيح بقى العالم صغير بالنسبة لك الخطية بقت لم تقيدك الماضى بتاعك مابقاش يؤرقك أنا أخذت المسيح خلاص يقول لك بس أنت مش عارف بس خلاص ما المسيح غفر المسيح نقل واحد كان ميت وحيى هتقعد تكلمه عن الموت ما هو حى خلاص هو قدامك دلوقتى شخص حى الموت كان ده كان ماضى كانت مرحلة وخلصت خلاص ماينفعش تقول للعازر بعد ما قام من الموت يا ميت يا ميت يا ميت عمال تقول لى ميت ميت بس أنا أهو قدامك حى وأدينى بتحرك يبقى مين اللى صح فينا أنا وإلا أنت خلاص يبقى أنا حى عشان كدة قال لنا أنا حى فأنتم تحيون فأنت بنعمة المسيح خد حظك ونصيبك من الميراث اللى سابهولك خد حقك ونصيبك من النعمة اللى أعطهالك مش عطيها لحد عطيها لأولاده ماهو ماينفعش هو يقوم وأولاده موتى أيه فايدة المسيح يقوم واحنا أموات أيه الفايدة واحنا عمالين نقول اخرستوس آنستى والمسيح قام أيه الفايدة والكنيسة كلها صورة المسيح القائم عشان يبقى المسيح قام لأ مش عشان المسيح قام عشان احنا قمنا لأن هو ماقامش عشان نفسه هو ماقامش يعمل عمل كدة وتروح الناس كلها كدة مسقفة برافو برافو شفتم هو عمل أيه لأ هو قام عشان يبطل شيطان الموت قام عشان الموت لا يسودنا قام عشان احنا كمان نقوم من خطيتنا اللى يعيش الكنيسة صح يقول لفترة الصوم الكبير يا سلام ياه أيه الجمال ده نفسى الصوم الكبير مايخلصش عايزه يفضل على طول كدة وبعد كدة ينتقل على الخماسين يقول أيه ياه أيه الفترة الجميلة دى نفسى الفترة الجميلة دى فترة الخماسين متخلصش بس خلى بالك اللى هيقول الخماسين ماتخلصش لازم يكون قبلها قال أيه نفسى الصوم الكبير مايخلصش أحسن ما يقول على حاجة ثانية لأ هو يقول الصوم الكبير جميل مفرح مشبع تدخل على القيامة تقول أيه دى أكثر فرحاً وأكثر شبعاً وأكثر سروراً والكنيسة يا احبائى عايزانا نتمتع بالابدية واحنا على الأرض عايزة يبقى أنتقالنا للأبدية ده أمر هين وسلس جداً عايزاه يبقى محصلة طبيعية لما تحياه الآن أنتقالنا للأبدية زى بالظبط كدة لما واحد يروح رحلة يمشى يمشى يمشى كثير بطيارة ولا بعربية وبعدين بيجى كدة يقولوا له أنت دلوقتى فى أمريكا بشكل هين جداً هو قطع المسافة بس لسة بتقطع بك المسافة للأبدية تبقى تلاقى نفسك لما تعمل لا تنزل فين فى اورشليم السماوية تبص تلاقى الموضوع ده يقول لك آه ما هو الكنيسة اشتغلت معانا شغل كثير بقى عشان كدة أنت فى الوقت بتاعك اللى اسمه الرحلة الابدية اللى أنت فيها دلوقتى دى الرحلة اللى فى الآخر هتوصل بها هتوصل بيها لأيه للسماء عشان كدة فى القداس يجى فى بداية القداس يقول ارفعوا قلوبكم فتقولوا هى عند الرب وقبل ما التناول يبتدى يقول لك احنا وصلنا خلاص تقول فلنشكر الله الآب ضابط الكل لأنه جعلنا أهلاً ان نقف فى هذا الموضع المقدس أيه بقى ده موضع السماء أنت خلاص دخلت على السماء وهتدخل على شجرة الحياة اللى هو التناول عشان تاكل منها اللى ياكل منها لا يموت أنت أخذت القيامة أنت كنت ميت وحييت أنت أنتقلت من حالة لحالة من حياة إلى حياة عيش فى الكنيسة وأفرح بها واحضر القداس وتوب فى القداس وصلى فى القداس وارفع قلبك فى القداس ماتسرحش وركز وكل ما تسرح ارشم على صدرك علامة الصليب وكل ما مشاعرك تبرد شوية تقعد تقول يا رب انعم لى بغفران خطايانا تقعد تقول يا رب أنا غير مستحق وفى الآخر تقعد تقول الصلاة بتاعة الصلاة قبل التناول و تتناول تفتح فمك تاخد الجوهرة الغالية كثيرة الثمن تاخد لؤلؤة الآلئ تاخد المسيح تقفل عليه بقى على فمك كدة وكأنك عايز تقول أيه أنا عايز أستمتع بك بقى أدخل جوايا وأقفل عليك عايز أخبيك جوايا نفسى أخرج من الكنيسة ما أكلمش حد نفسى أخرج أصلى نفسى أخرج أكرز باسمك نفسى أخرج من هنا على السماء مش عايز أكمل أيامى يقول لك لأ أنت هتكمل أيامك عشان لك رسالة على الأرض لغاية لما تبقى تاخد استحقاق الحياة الأبدية ربنا يعطينا يا احبائى فى فترة الخماسين نتمتع بالمسيح القائم نثبت فى المسيح القائم تتحول حياتنا من موت إلى حياة . ربنا يقبل توبتنا ويكمل ويسند كل ضعف فينا ولآلهنا المجد أبداً أبدياً آمين .