العظات

إنجيل البركة

بسم الاب والابن والروح القدس الاله الواحد امين تحل علينا نعمته ورحمته وبركته من الان وكل اوان والى دهر الدهور امين.الاحد الثالث من شهر ابيب تقرا علينا احبائي الكنيسه في هذا الصباح فصل من بشاره معلمنا لوقا الاصحاح التاسع( انجيل البركه )..قالوا له اصرف الجموع ليذهبوا الى الكرى ليستريحوا لاننا ها هنا في موضع خلاء فقال لهم اعطوهم انتم لياكلون فقالوا ليس عندنا اكثر من خمس ارغفة وسمكتين الا ان نذهب ونبتاع طعاما لهذا الشعب كله لانهم كانوا نحو خمس الاف رجل فقال للتلاميذ اتكئوا 50 50 ففعلوا هكذا واتكاوا الجميع فاخذ الارغفه الخمس والسمكتين ورفع نظره نحو السماء وباركهما ثم كسر واعطى التلاميذ ليقدموا للجميع فاكلوا شبعوا جميعا ثم رفعه ما فضل عنهم من الكسر اثنتا عشره قفة... ازاي انجيل البركه احبائي هو انجيل نتعلم منه كيف نتخطي عقولنا وتفكيرنا البشريه المحدوده الغلبانه.. انجيل البركه الذي يقول خمس خبزات وسمكتين اطعمه 5000 رجل ما عدا السيدات والاطفال وكمان اكلوا واشبعوا وارفع عنهم 12 قفه مملوءه... ايه انجيل البركه ده؟؟ البركه لما الحاجة تتحط في ايد ربنا تصبح كتير بايد ربنا... البركه هو العمل الالهي في الامور الماديه... البركه هو ازاي القليل بربنا يبقى كثير ...عدم البركه ايه بقى.. الكثير من غير ربنا ايه يبقى . قليل... والقليل بربنا يصبح كثير.. تعال بقى لما تحط الامر ده في ايد ربنا هتلاقي نفسك مطمئن قوي ..عشان كدة عاوز اتكلم كام دقيقة كدة عن انجيل البركة ...البركه في الامور الماديه البركة فى الأمور الروحية اول حاجة البركة فى الأمور المادية.. تعال كده نحسب اي حسابات مادية.. هتلاقيها ما تجيش ابدا ما تجيش خالص .. اتذكر في بدايه رسالتي كنت قاعد مع شاب قال لي يا ابونا انا عاوزك تتخيل اني لقيت شغل بمرتب 2000 جنيه في الشهر الكلام دة كان من 15 او من 20 سنه وحوش ال 2000 جنيه كلهم وخليت بابايا يصرف عليا تخيلل هيبقى معايا في السنه كام؟؟ 24؟ كمان عشر سنين هيبقى معايا كام؟؟ هيجبولى شقه بعد عشر سنين؟؟ الكلام ده بالحسابات العقلية... الولد ده بقى كويس جدا جدا وربنا دبرلة كل اموره... ايه الحكايه لا الحكايه ما بتجيش كده يا ما تلاقي واحد يقول لك اصل انا لا خلاص كده انا جبت طفل مش عايز ثاني بس انت عارفه الطفل بكم في الحضانه طب عارف يا ابونا الطفل بكم في المدرسه يا ابونا مصاريف المدرسه السنه دي بكام يقولك رقم فى الحقيقة تتخض.. احيانا لما يجوا ناس من بره اليومين دول ربنا يبارك ولادنا بيجوا من بره اجازه في الحقيقه بيستغربوا قوي بيقولوا فى الحقيقة الحياة غاليه عندكم قوي الناس عايشه ازاي هاقول لك صدقني لو سالنا انفسنا الناس عايشه ازاي هاقول لك مش عارف بركه احبائي في حاجه اسمها البركه في حاجه اسمها ربنا بلاش ندى ربنا اجازه .. انا القرشين اللى معيا هرشم عليهم علامه الصليب واقول يا رب انت اللي تبارك .. البركه احبائى ان انسان يبذل كل ما في جهد وسيب الباقي في يد ربنا هو ده البركه خذ بالك لما قدمه الخمس خبزات والسمكتين ده كان كل اللي عندهم وكل اللي معهم قدم كل اللي معك وسيب الباقي على ربنا يعمل اللي يعمله اتفرج على شاب بيتجوز بيتجوز ازاي ربنا دبرها.. ماشي عاشوا ازاي ربنا دبرها مشيت .. هل ده نوع من انواع التواكل لا طبعا انا بقولك اعمل اللي عليك.. بس ارجوك بلاش تبقى فاهم انك عايش بحسابات انت موضوع متعب ومعثر وبيخلي الانسان كده بيجيلو حاله من الحزن والفشل .. امال نعمل ايه؟ تقول له يا رب دبر والذى خلق السماء والبحر والارض وكل ما فيها مش هيعرف يدبر اموري جميل ان انت تختبر ربنا في امورك الماديه وامورك العمليه والحياتية القرشين اللي معك لما تيجي تاخذ المرتب بتاعك ..اول حاجه تعملها تطلع العشور بتاعك.. تقولى يا ابونا هو مكفي اطلع الشعور ...اقولك دى البركة هو انت مفكر انك عايش بالأرقام الارقام ما تنفعش الاباء علمونا يقول لك ايه خذ بالك فى المصطلح الروحى فى معادلة كدة في الحساب غلط ليه بقى يقول لك تسعه اكبر من عشره اقول لك لا تسعه اصغر طب ازاي تتحل هاقول لك تسعه اكبر لما تطلع منها العشور يرشم علامه الصليب خليك شاكر خليك راضي اشكر ربنا ربنا ما يديك الصحه وانت و مراتك واولادك ..تشكرة ان ربنا حمانا من كذا ومن كذا كلها تدابير من عند ربنا نشكرك نشكرك نشكرك الرضا جميل والشكر جميل والقناع جميله عشان كده النهارده الانجيل البولس النهارده بيكلمك عن محبه المال اللي هي اصل كل الشرور محبه المال اصل كل الشرور بيكلمك على انك ازاي تكون مكتفي بما عندك البركه في امورك الماديه والعقليه اول ما تلاقي كده مخك يقف ترفع قلبك وتقول له يا رب يا رب دبرها مش احنا بنقول له دبر حياتنا كما يليق يا معطيا طعام لكل ذى جسد الواحد لما يقعد يفكر الطبيعه دي كلها ماشيه ازاي تدابير الهيه حسابات تفوق حسابات البشر لما بني اسرائيل تمردوا على ربنا ..لما قالوا هتدينا اكلة فطار ولة عشاء ؟ قالهم لا انا هعطيكم اكل ٤٠ سنة لحوالي 3 مليون فرد في حد يقدر ياكل احد ثلاثه مليون فرد؟ لمده 40 سنه المن.. ايه ده يا رب ده حسابات ربنا طبعا عجيبه ويوم ما يحب يخرج لهم مياة يخرج مره مياة مرة.. يخرجها لهم مره من صخره حاجات مستحيله.. دي ثقه الايمان في ربنا والايمان في عمل ربنا الايمان في الامور العمليه اول ما تلاقي عقلك كده واقف عند معادله ومش عارف يا رب دبرها انا باعمل اللي علي لتكن ارادتك يا رب يا رب دبر بركه الرب تغني وتزيد ياما نشوف ناس عايشوا في منتهى الرضا والاكتفاء بدخل محدود لما نشوف موظف دخله محدود وعنده اربع اولاد في كليات.. ازاي داخله محدوده والاولاد لها طلبات وعاوزين وعاوزين وعاوزين... طب ازاي اصل الانسان لما بيبقى جواة غنى بيعرف ازاي يعيش بالبركه الانسان اللي بيبقى جواه فقير مافيش حاجه تبقى عجباة ابدا وعلى طول بيشتكي وعلى طول متضايق وعلى طول بيتكلم عن الغلاء وعلى طول حارم ولادة وعلى طول عامل لنفسه عذاب نفسي.. اصل البركه مش موجوده اصل عايز يعيش بحساباتهم عاوز يأمن المستقبل بحسابات وهو لا لا لا دي معادله فاشله التلاميذ لما قالوا له مانقدرش نبتاع طعام لهذا الشعب جميعا واحد كده اسمة فيلبس فى فصل اخر قال كدة مايكفيش ولا ٣٠٠ دينار دى الحاسبات البشرية ربنا يدينا ان كل واحد يجتهد فى حياتة بس يؤمن بالبركة الامور الروحية... يعنى جهادك الروحى البسيط جدا وقفتة الصلاة القليلة..قراتك فى الكتاب المقدس الضعيفة..حضروك القداس اللى بتشتت قولة بص بقى يارب دى حدودى انا غلبان وضعيف ومشتت وكسول حط انت بس شوية الجهاد بتاعك ياسلام تلاقى ربنا قابلهم وفرحان بيهم وفرحان بجهادك وتعبتك..تقولة بس دى حاجة تكسف يقولك بس تعالى ماتتكسفش زى ماقدموا خمس خبزات وسمكتين بصراحة حاجة تكسف..معقولة خمس خبزات وسمكتين هيأكلوا الناس دى كلها...فى المعادلة الطبيعية ما فيش حاجة تكسف فى المسيح يسوع خذ التجربة قدم صلواتك الضعيفة وجسدك الضعيف قدم طلبات وجهاد روحى على قد طاقتك قولة يارب اعن ضعف ايمانى معلش يارب سامحنى انا بقدملك القليل بس انا واثق انة فى ايدك هيبقوا كتار فى طلبة الكنيسة بتقولها الذين يريدون أن يقدموا لك وليس لهم ...اللى عاوز يقدم سوا ع المستوى الروحى هتلاقى جهادك الروحى الضعيف دة مقبول عند ربنا وفرحان بية قوى البركة فى الأمور المادية والأمور الزمنية بلاش تشغل حساباتك الزمنية..لانة بيقولك على فهمك لا تعتمد ربنا يبارك حياتكم يبارك فى اموركم المادية ويملاها بالبركة بالبركة بالبركة ونكمل نقائصنا لالهنا المجد اللى الابد الامين ويكمل نقائصنا

ان لم ترجعوا و تصيروا مثل الاولاد فلن تدخلوا ملكوت السموات

ان لم ترجعوا وتصيروا مثل الاولاد فلن تدخلوا ملكوت السماوات بسم الاب والابن والروح القدس اله واحد امين احل علينا نعمته ورحمته وبركته الان وكل اوان والى دهر الدهور امين تقرا علينا احبائى الكنيسه فصل من انجيل معلمنا متى اصحاح 18 فى تلك الساعه تقدم التلاميذ الى يسوع قائلين من ترى هو الاعظم في ملكوت السماوات؟طبعا سؤال كانوا يتوقعه لى اجابات كثيره جدا في ذهنهم كان فكرهم مثلا هيقول لهم ان اللي يصوم كثير اللي يعرف كثير يعلم كثير لكن وجدوا ربنا يسوع المسيح راح شاور على طفل صغير وقفه في النصف ودي بيقولوا عليها احبائي من ضمن طرق التعليم اللي هي طرق استخدام وسائل الايضاح ربنا يسوع المسيح يستخدم وسائل الايضاح من 2000 سنه جابت طفل صغير وقال لهم الحق اقول لكم ان لم ترجعوا وتصيروا مثل الاولاد فلم تدخلوا ملكوت السماوات... كل واحد فينا كده يعد يبص لطفل صغير طفل سنتين ثلاثه اربعه يشوف الولد ده طريقته ايه افكاره ايه مشاعره ايه هتلاقيها كلها بساطه.براءة . هتلاقيها كلها نقاوه.. هتلاقي اكبر مشكله عنده مثلا ان في لعبه معينه مش معاة دلوقتى... هتلاقي اكبر مشكله مثلا انا عايز ياكل حاجه معينه ... عاوز يتفسح عاوز يركب عجل حاجات بسيطه قوي..الاطفال دوول.. الرب يسوع عاوزنا نرجع زى الاطفال دول.. يا سلام لما الواحد يجي يراجع نفسه يقول يا ترى انا قلبي قلبي طفل...؟ ياتري فكري فكري طفل؟ يا ترى مشاعري مشاعر طفل؟ يا ترى افكار قلبى الداخليه افكار طفل؟ دائما الاطفال يتسموا بالوداعة.. الاطفال يتسموا بالنقاء والبساطة.. بالتواضع .. هتلاقى حتى الطفل كدة جسمة صغير.. شوف كده لما نيجي نعمد طفل بنحطه على حته ترابيزه صغيره.. بقى معقول حتة ترابيزه صغيره تاخذ جسم طفل؟؟! الواحد عشان تحطه على ترابيزه ما فيش ترابيزه تكفية!! ده عاوز سفره!! لكن ربنا بيسمح ان يكون الطفل صغير في كل شيء... الواحد عاوز يقول يا رب رجعني رجعنى لقامة الطفولة الجميلة دى..رجعنى لبساطه القلب و نقاوه القلب اقصى طموحات الطفل اية؟ ايه اكثر حاجه نفسة فيها هتلاقي طموحاتة بسيطه تعالة كده اتفرج على طموحات الناس الكبار ياه.اللى عايز بقى أرض.. واللي عاوز عربيه..اللى عاوز شقه كبيره.. اللي عاوز فيلا.. واللي عاوز عماره.. اللي عاوز ملايين طموحات كبيره قوي اما نيجي للطفل بقى هنلاقي مسكين ..كل طموحاتة بقى يبقى عنده لعبه ولا حاجه... تعالة كده انت طفل الورقه ب 5 جنيه ورقه 200 جنيه. هتلاقية. ولا عارف دي ولا عارف دى... ولا عارف الفرق بينهم.. امتى الانسان يوصل لدرجه الطفوله دى من جوة قلبة ؟ طفولة حقيقيه من جوة قلبة . عشان كده قالنا رب المجد لازم ترجعوا وتصيروا مثل الاطفال..وفى الحقيقة احبائى شوفنا فى قديسين كتير لما عاشوا جوة الاحضان الاهية وجوة اعماق المحبة الإلهية وجدناهم فى قامة الطفولة دى بقى العالم مايشغلهمش..ولا المقتنيات تشغلهم بقى يمسك الشئ وكانها مالوش قيمة..زى ما قال معلمنا بولس الرسول الذين يشترون وكأنهم لا يملكون الذين يستعملون هذا العالم كانهم لا يستعملونة كلمه استعمال في اللغه الانجليزيه yse عندك كرسي انت بتقعد عليه يبقى yseاستخدام.. عندك اي حاجه انت بتستخدمها او بتشتغل بيها...يبقى بتستخدمها العالم بالنسبه لنا احنا بنستخدم بنستعمل العالم.. الاطفال احبائي نتعلم منهم التواضع الشديد حاجه تؤذي الانسان ذاتة العليا.. كبريائة تعال كده شوف طفل يزعل شوف تصالحة ازاى؟ لو عملتوا له شوكولاته كده ولة حاجه تلاقيه ابتسم طب فين الزعل راح فين ؟هتلاقيه خلاص ولة تجبلة لعبه بتعمل صوت كده ولا حاجه ولة بالونة تصالحة لعبة صغيره تصالحوا حاجه بسيطه تصالحه ايه البساطه دى!! امتى الانسان احبائي يبقى قلبه بالبساطه دي.. يجي الواحد يقول لك انا زعلان من فولان.. تقول له بقالك قد ايه؟ بيقول لك بقالى30 سنه..يارب ارحم.. ايه ده ايه ده؟! عشان كده احبائي لازم نرجع للطفوله الجميله.. عشان كده بننصح الولاد والبنات.. وبنقول لهم احتفظ لك بصوره..وانت طفل صغير . انظرلها شوف نفسك انت عندك ثلاث اربع سنين كده وشوف كميه التلوث اللي حصلت لي الفساد اللي دخلت جوة نفسي وعقلي كميه الانحراف عن الهدف.. يا رب انت خلقتني كده!!! زى مابنقول فى الترنيمه رجعني زي صورتي الاولانيه خليني شبهك هي دي قامت الطفوله احبائى عشان كده رب المجد جبلهم طفل وقال لهم عايزين تعرفوا مين الاعظم هو ده الاعظم كلما كبرت الذات كلما زادت عظمه الانسان جواه نفسه قله العظمة الحقيقية.. تزيد الذات تقل العظمه تقل الذات تزيد العظمه كلما الانسان احبائي انتبه الى حقيقه شوف صورتك كده وانت طفل الواحد يحزن على نفسه قوي.. قل له يا ربي سامحني سامحني على كذا وكذا وكذا شوف فساد الطبيعه شوف التلوث اللي حصل للانسان.. قولة يا رب اشفيني من كذا من غروري كبريائي طموحاتى اللي مخليني ابقى شغوف جدا بكل ما هو الدنيا اللى مخليني دائما خلاف مع الناس.. في الاخر كده قال لهم رب المجد في العالم هيكون في عثرات لابد ان تاتي العثرات لكن ويلا لمن تاتي بهم العثرات قال لهم الأطفال اوعى حد يعثرهم..اوعوا حد يعثر حد يكون قلبة صغير ولة نفسة ضعيفة..اوعوا حد يعثر حد فى الكنيسة ولة فى المسيح..ويللا لمن تاتى بهم العثرات...من اخطر الحاجات اللي الواحد ممكن يسمعها ويتالم منها جدا.. لما واحد يجى يقولك. فلان. بيروح الكنيسه وانا ما بروحش الكنيسه بس هو بيعمل وبيعمل وبيعمل يا ربي وكان الشيطان مسخر ناس تعمل عثرا في ربنا تعمل عثره في الكنيسه تعمل عثرة في المسيحيه وكانة عايز يقول لك المسيحيه دي بلا قيمه يقولك أدى يا سيدى اللى بيروحوا الكنائس.. اللى رافع قواضي على ا اخواته ادى اللى متخاصم..ادى اللى يعمل كذا مع الناس... قاعد بيعمل كده في تجارته يعمل كذا ويعمل كذا يعمل كذا ويلا لمن تانى بواسطة العثرات احنا احبائي صوره للمسيح انتم سفراء المسيح ..انتم شهود للمسيح .. انتم النور الذي ينور العالم انتم الحق في الحياه انتم النسل المبارك.. انتم ورثه الملكوت فتنيروا كانوار في العالم تخيل كده لما العثرة تيجي من ابناء الملكوت يا رب ارحم يا رب يارب ما تسمحش ابدا ان حد يعثر فيا. ولا يعثر فى تصرف ليا ولا يعثر فى سلوكياتى خليني يا رب اقرب لك كل الناس ليك خلى اللى يعرفنى يعرفك خلي اللى يعرفني يمجد اسمك.. زي ما قال معلمنا بولس الرسول..يسجدون الى اللة ويقولوا إن اللة بالحقيقة فيكم.. .دة احبائي الدور بتاعنا ربنا يرجعنا لقامة الطفوله ربنا مايسمحش نكون سبب عثرة لحد وان اكون سبب بركه ومجد لاسمة القدوس المبارك يكمل نقائصنا ويزيل كل ضعف فينا لالهنا المجد اللى الابد الامين

قد أقترب ملكوت السموات

بأسم الاب والابن والروح القدس الاله واحد امين.. فلتحل علينا نعمته ورحمه وبركاته الان وكل اوان الى دهر الدهور كلها امين ..الكنيسه النهارده احبائي بتقرا علينا فصل من بشاره معلمنا لوقا....لما يقول ثم عَين الرب 70 اخرين وارسلهم اثنين اثنين.. هنتكلم في نقطه واحده بس ..انت يا رب يسوع المسيح لما ارسلت رسلك عشان يكرزوا..قولت لهم يقولوا ايه؟ قولتلهم يقولوا حاجه واحده بس ... انه قد اقترب ملكوت السماوات تخيل انت كده يروحوا اي قريه اي مدينه يتكلموا مع اى شخص...يقولوا اقترب ملكوت السماوات.. في الحقيقه اقتراب ملكوت السماوات فيها ملخص لكل الوصايا المسيحيه اكثر حاجه تخلي لنا اشتياق لحياة مع ربنا جميله اقتراب ملكوت السماوات ...واكثر حاجه تطفي فينا حضور الله ومخافه الله وحفظ الوصايا وتطفي فينا محبه الصوم ومحبه الصلاه ان احنا لم نشعر بملكوت الله نشعر ان حاجه بعيده جدا حاجه مش فى اهتمامنا طب عاوز تبدل الامر ده خليك دايما تفكر في ملكوت السماوات احنا كل يوم واحنا بنصلي نقول ياتي ملكوتا دي شهوه عبيد الله الحقيقيه ان اقترب ملكوت السماوات لما واحد يحس ان الملكوت السموات اقترب يعمل ايه؟ تلاقي عنده استعداد وعنده اشتياق ومحبه صلاه محبه غفران ومحبه ترك ..عندة عدم محبه العالم ... لمجرد ان عندك اقترب ملكوت السماوات وده سؤال كل واحد فينا بيساله شعوري وشعورك باقتراب ملكوت السماوات قد ايه ؟ على قد الشعور ده على قد مقياس حياتك مع ربنا كل ما حسيت ان الملكوت قريب كل ما حسيت ان حياتك مع ربنا جيده كل ما حسيت ان ملكوت الله بعيد كل ما تعرف ان حياتك مع ربنا مريضه وحياتك مع باردة وحياتك مع ربنا ما لهاش هدف ..يلا كده كلنا نراجع نفسنا .. كأن الاباء الرسل جايين يبشرونا من جديد ويقولوا لنا ايه يا جماعه خلي بالكم قد اقترب ملكوت السماوات ليه بتتخانقوا ليه بتفقدوا سلامكم ليه عينيكم على الارض ليه ما عندكمش محبه وعندكم غيره ليه مش مَسلمين اموركم لربنا.. ليه ليه ليه ليه... اقول لك عشان فكره اقتراب ملكوت السماوات بعيده عنك...قرب شويه لحقيقه الملكوت ...واحنا بنصلي القداس اهدينا يا رب الى ملكوتك... واحنا بنصلي ابانا الذي بنقول ياتي ملكوتك واحنا بنقول قانون الايمان نقول وننتظر قيامه الاموات وحياه الدهر الاتي امين.. نصلي صلاه النوم نقول له هو ده انا عتيد ان اقف امام الديان العادل الان يا سيد تطلق عبدك بسلام حسب قولك واحد نفسه ينتلق من الحياه دي.. ليه ؟ لانه اقترب ملكوت السماوات شعور اقتراب ملكوت السماوات ده احبائي شعور بيجي للانسان اللي فعلا بيحب ربنا من قلبه ..واللى عينه ع المكافاه.. اكرزوا وقولوا قد اقترب ملكوت السماوات...كتير ناس بتستخف بهذا الامر ياما ناس بتعتبر ان الكلام ده وهم ياما ناس بتعتبر ان الكلام ده بعيد قوي قوي... اقول لك لا.. الانسان القريب من ربنا يحس ان الملكوت قريب قوي قوي يحس ان الملكوت يبقى النهارده ده مش بس النهارده لا ممكن يبقى دلوقتي ناخذ تدريب بسيط وكأن الرسل جايين كل يوم بيكرزونا من جديد ويقولوا يا جماعه قد اقترب ملكوت السماوات..وعندما اشعر ان اقترب ملكوت السماوات حاجات كثير تتبدل جواك..حاجات كثير تتولد جواك..وحاجات كتير تموت جواك...ربنا يثبت فينا حقيقة اقتراب مجيئة لالهنا المجد الى الابد امين....

مجنون أعمى اخرس

مجنون اعمى اخرس بسم الاب والابن والروح القدس اله واحد امين تحل علينا نعمته وبركته ورحمته الان وكل اوان والى دهر الدهور امين... فصل من انجيل بشارة معلمنا متى البشير بيتعاد علينا في الكنيسه كثير قوي.. حين اذن احضر اليه اعمى به شيطان تلاقيه في بعض البشاير الاخرى احضر الية مجنون اعمى اخرس..فى أمراض بيتقال عليها متلازمه بتبقى شبكه امراض.. مع بعضهم يعني حاجه بتجيب حاجه بتجيب حاجه يبقى فيه متلازمات في الامراض الجسديه هكذا في الامراض الروحيه في متلازمتات .. في الحقيقه يعني اختارها المرض الاولاني اللي هو الجنون بعيد عنكم جنون اختلال العقل تفكير الغير منطقي تصرفات غير المنطقيه ثلاث حاجات احنا عايشين بيهم التفكير والمشاعر والاراده لما بيكونوا مرتبطين ببعض الثلاث حاجات دول الانسان بيتصرف كويس يعني مشاعري دلوقت مثلا يعني انا عايزه اكل بس عقلي بيقول لي ما يصحش هنحضر قداس وتتناول..فارادتى تقول لا مش هاكل دلوقت ده كده معناه انه شخص الثلاثه مظبطين مع بعض المشاعر مع العقل مع الاراده لكن لو الثلاثه مفكوكين من بعض هتلاقي ان الانسان يعمل حاجات ضد العقل ضد المشاعر ضد الاراده الثلاثه مفكوكين من بعض ده الجنون القديس العظيم الانبا انطونيوس شبه الخطيه بالجنون قال اصل الخطيه نوع من انواع اختلال العقل الخطيه نوع من انواع الانسان الغير متزن اللي مش بيحس بتصرفاته دة كدة اسمة اية...اسمة الجنون... يعني تخيل كده لو واحد بيكلمك على انه مثلا يبيع الشقه بتاعته تقول له عايز كام .. يقول لك10 جنيه..دة مجنون . يعني كده ده واحد بيعمل تصرفات غير منطقيه اصل هو مثلا جعان وعايز يجيب ساندويتش طب جعان وعايز يجيب سندوتشات .. طب يعني جعان يقوم يبيع شقه!! ده كده اسمه جنون..... الانبا انطونيوس قال الخطيه جنون لان فى الحقيقه احنا بنعمل في الخطيه حاجات غير منطقيه ايه هي ان الانسان يخسر حاجه غاليه عشان ياخذ حاجه رخيصه يخسر حاجه كبيره عشان ياخذ حاجه قليله ده كده اسم مجنون ما هو المثل اللى احنا لسه قلناة من شويه ده بتاع الراجل اللي عايز يبيع الشقه بشوية ملاليم .. طب ما احنا كثير بنبيع ماسكنا الابدى بلذة ارضية واحد زي عيسو انغلب لشهوه بطنه قال له عاوز اكل قالة ا ديني بكوريته قال له ايه ؟قاله اتفضل قال له يا سيدي بلا بكوريه بلا بتاع مش انا ماضي الى موت يعني مش هتنفعني بحاجه (جنون) باع الغالي بالرخيص طب يا عيسوي طب خليها دة جنون ... اهو ياما احنا احبائي بنقع في نوع من انواع الجنون ده ان الواحد يختار الارض عن السماء واحد بيختار 10 20 سنه عن الابديه واحد بيختار انة يتمسك بامور ذائلة.. الكتاب المقدس بيقول الحياه بخار يظهر قليلا ثم يضمحل.. احنا عايزين نمسك البخار بايدينا نتيجه امسك البخار بيدينا تلاقي ايه.. ما فيش حاجه .. عشان كده ا احبائي لما الانسان يكون مش بيفكر صح يعمل ايه ؟؟يعمل للابديه لازم تعرف ان كل الاشياء اللي احنا عايشين بها ان كل ده زائل لدرجه انو معلمنا بطرس قال في وقت هتنحل العناصر الحل العناصر يعني ايه ما يبقاش فيه مواد الحياه هي دي العناصر.. العالم كله يزول وشهواتة لابد ان يكون الانسان عاقل اومال المجنون عاوز اية ..عاوز يبيبع الغالى بالرخيص... وعاوز الحاجه بتاعه دلوقت وبس جنون .. ياما احبائي الاشياء بتصير عندنا الهة الاله بيبقى عندنا شيء ياما عبادة الأشياء تبقى فى قلبنا.. وفي از هنا وسعين اليها.. الواحد لازم يسال نفسه سؤال في كل امور حياته لازم تقول لنفسك سؤال صغير جدا حطه قدام قلبك وقدام عينك .. قل له بعدين؟؟ جبت كذا اشتريت كذا جبت عملت كذا جبت عربيه سفرت هاجرت اسال نفسك وبعدين وبعدين وبعدين اصل من ضمن جنون الخطيه ان الانسان ما بيكونش واخذ باله من حكايه بعدين دي مش واخذ باله هو عاوز دلوقت وخلاص.. بولس الرسول يقول ايه ان نقض بيت خيمتنا الارضى فلنا في السماء بناء.... ساعات بيكون الانسان متلخبط شايف ان الحياه بتاعة دلوقت وبس تقول له السماء يقولك دةوهم الدينونه يقول لك ده تهويش ممكن يثبت لك اصلا اللي ما فيش حياه ابديه ولا في اي حاجه ما فيش حاجه اسمها ده دينونة عايز يسكن ضميرو عايز يعمل نفسه حسابات خاصه حين حينئذ احضر اليه مجنون اعمى اخرس اصل الجنون يجيب العمى والخرس اصل الواحد مش شايف ياما الانسان احبائي الخطيه بتعمى بتخلي الانسان ما بيكونش شايف حقائق الاهية....قصة النهاردة بتاعت القس بيقول لك شماس شماس صغير شاف رؤيا شاف اثنين نورانيين حاضرين في الكنيسه بيباركو الشعب وبيشوفوا امراض وعند البخور ع المذبح شم ريحه جميله ياما حاجات في الروحيات اللي بنمارسها محتاجه ايمان اكتر من العيان و محتاجه نظره روحيه عين مفتوحه زى الترنيمه مابتقول لو الروح يدينا نشوف الكنيسه دى بالروح مش يعنينا... هنلاقيها سماء ثانيه حاجات كثير احبائي في حياتنا محتاجين نشوفها من نظره الاهية من النظره كتابيه ايه العالم ونستخدم العالم... ايه الاولاد لمجد المسيح نربيهم حسنا يحمله اسمه بين الناس دول شهود وامناء للمسيح نظرتي للمال انه وسيله نظرتى للنجاح انه لمجد المسيح نظرتي للحياه انها قصيره المال وسيله لما الانسان يعقل تلاقي كده شويه.. شويه تراب يتشالوا نشوف بقى الامور على حقيقتها تعرف يعني ايه مرض يعني ايه سماء يعني ايه ان الجسد ده ضعيف جدا جدا جدا يعني ايه ان يصنع محبه نسمع رحمه ونصنع صدقه ما خلاص مع الحاجه اللي كان متمسك بها عارفين ان هي ثراب... ابتدي يعقل ليه يعقل؟ خلاص بيقولوا اذا كان يشوف الشخص عاقل ولا مجنون فى مستشفيات الامراض العقليه بيعملوا لهم اختبارات كتير لهم مثلا ينظف مكان يشوفوه ينظفوا ازاي.. يشوفوا كدة اذا كان يقعد ينضف مكان يجمع شويه تراب وبعدين يروح يرميهم ثاني.. يقولوا ما خلاص اه تقريبا لسه الحكايه مش مضبوطه معي.. بعدين يجيبوا حاجه يعملوها ميه بيقولوا له خذ المساحه والجردل واقعد امسح الميه بيلاقوا الميه اللي بيشيلها في الجردل يفضيها ثاني.. وهكذا.. خلاص يبقى ده لسه لسه تفكيره مش مضبوط.. المفروض بقى كان اهم حاجه يعملها كان يقفل الحنفيه ما هي طول ما انت عمال تنشف في الميه و حنفيه مفتوحه ابقى كده عمرك ما هتعرف تلم الميه اهو ياما كده احنا احبائي بنعمل كده سايبين الحنفيه مفتوحه تنزل شر علينا سايبين الدنيا هي اللي تمشي فينا سايبين رغبتنا شهوتنا هي اللي بتدفعنا... عشان كده معلمنا بطرس الرسول يقول لنا ايه انما نهايه كل شيء قد اقترب فا تعقلون واصحوا...( مجنون اعمى اخرس) ولا شايف ولا سامع الاله اللي في حياتي ما اعرفش وانا سامع ولا شايف شايف اكل وشرب ودنيا هو ده اللي انا شايفه شايفه فولا وفلان.. لا بس انا عاوزك تشوف حاجات.. ثانيه اشوف ايه ..شوفي ان الدنيا دي صغيره قوي.. لازم تشوف انك ازاي تصنع بره وتشوف المسيح في الناس لازم عينك تبقى عين بتشوف لازم تقول نسبحك نباركك نشكرك نمجدك ننطق بوجودك وباسمك ده الانسان اللي بيبارك اي اي كلام بيقولوا الانسان طول اليوم ما فهوش بركه ربنا مفهوش بركه الست العذراء والقديسين ما فهوش علامه الصليب يبقى ده انسان اخرس( لسان ) ياما الانسان احبائي محتاج يشوف الامور على طبيعتها يترجم الامور صح يشوف المرض .. يقول له يا يا رب اشكرك على الصحه اللي انت اعطتهالى.. بس انا عارف ان الجسد والصحه ذائل.. عامل حسابي كويس قوي ان الجسد ده زائل انا عارف يا رب وانا بشكرك على شويه الصحه اللي انت اديتهم لي...( ده كده انسان بيترجم الامور)) تجربه زي اللي العالم كله بيمر بيها دلوقت دي وباء يكتاح العلم العالم كلة لو ما فهمناش الدرس يبقى (مجنون اعمى اخرس مش فاهم) مش فاهم ربنا عايز يقول ايه ربنا عايز يقول يا جماعه انا موجود انا قادم انا معطيكم كل شيء باركونى مجدونى احمدونى مش بعاقبكم انا بقربكم. بس شايفكم مالهيين على راي مره الست العذراء كانت ظاهره الاطفال قالتلهم قولوا رساله للناس الوقت قريب وانتم تلهون.. انا عماله اشفع فيكم اشفع فيكم عمالة اقول لابني اصبر تأنى اديهم براح بس في الاخر لازم يكون في دينونه( الذين صنعوا الصالحات الى قيامه الحياة و الذين صنعوا السيئات الى قيامه الدينونه)) مش شايف الاحداث مش سامع(( اختم كلامي مره واحد كان تعبان قوي وصل لدرجه العنايه المركزه وقاعد في حجره العنايه وحاسس بقى بصوت الاجهزه وحاسس باقتراب ساعات النهايه فبص للسماء كدة وقالة كدة برضة يارب تاخذني بدون انذار ارجوك يا رب انقذني وانا اصلح نفسي وصلح في حياتي انا ما تعودتش منك يا رب ان انت تبقي قاسى عليا كدة .. واديني فتره كده عشان اعرف اتوب واتصلح انا يا رب كنت اعمى سامحني واديني فرصه ففعلا... عايش 10 او 12 سنه بعد الموضوع ده.... فحصل بعد كده انه تعب وراح نفس المكان فقعد يقول له برده كده يا رب ما تمهلنيش.. قال له ماامهلتكش... قال لها يا رب انت ما انت مانبهتنيش... قال لة كام جنازه حضرتها كم شاب انتقل . كم مريض زرتة كم فقير افتقدتة .. كم وكم وكم كل ده وانا مش باكلمك.. بس للاسف احيانا الانسان ما بيسمعش في انسان في ودانه وتصرخ وبرده مش سامع عشان كده ربنا عاوزنا نكون عندنا مجرده اشوف وافهم اقولة يارب ده انت مطول بالك على قوي.... انت كثر خيرك انك انت محتويني كثر خيرك انك صابر علي.. اصبر عليا يارب عشان اصنع بر .. عايزه اعوض اللي فين. ربنا يقول لك لا ما تخافش الحته دي على انا بتاعتي انا انت بس اطلب التوبه دلوقتى وتقدم خطوات عمليه ما يبقاش حبك لنفسك زي ما هو ولا للمال ولا للعالم ولا للمقتنيات ولا للارض.. ولا للشهوات ولا الغرائز... اقول له يا رب انا عاوز امجدك في جسدى عاوز اكرمك في حياتي.. عاوز امجد اسمك.. ساعتها هنخرج واحنا معافين تماما خلاص ابتديت افكر صح وابتديت اشوف صح واسمع صح فى الافلام لما كان يجي صوره الشخص المجنون ده يجيبوا متلخبط وشعره منكوش وعمال يزعق وعمال يضرب بعد ما يسوع شفاه جابوا لك واحد هادي متعقل ربنا يدينا احبائي ان نشفى من امراضنا الجسدية والروحية وان يصنع فينا اية صالحة ان يعطينا ان نشفى من أمراضنا الجسديه وروحيه ويكمل نقائصنا لالهنا المجد الى الابد امين

العنوان

‎71 شارع محرم بك - محرم بك. الاسكندريه

اتصل بنا

03-4968568 - 03-3931226

ارسل لنا ايميل